馬國明支持靚湯新劇留意親熱場面 鍾柔美陳曉華廟街演出勾讀書回憶

TVB一眾藝人歌手齊集油麻地廟街同大家一齊賀新春，除咗玩遊戲應節之外，當然唔少得以歌聲同大家歡度蛇年，有份參與演出嘅藝人包括鍾柔美Yumi、冼靖峰Archie、仲有中聲家族嘅顏志恒Benson、支嚳儀Venus、龍婷、李佳、黃劍文Kimman、劉威煌、顏米羔等助陣，為觀眾送上熱鬧嘅一夜，而三姐蕭秀香仲即場為大家炮製美食，等大家新年有口福。
TVB眾藝人歌手齊集油麻地廟街同大家一齊賀新春。
Yumi同演出場地好有緣，因為佢之前考DSE期間，不時到附近圖書館自修，以前成日經過呢個地方，而陳曉華Hera就讀嘅小學就喺場地對面，重回成長地令佢勾起滿滿回憶。
冼靖峰 鍾柔美龍婷馬國明
馬國明Kenneth同太太湯洛雯Roxanne呢排各有各忙為自己新戲同新劇宣傳，新春期間佢哋留港度歲，馬明話幾忙都好，太太有份演出嘅劇集一定捧場，仲大讚劇集輕鬆又搞笑，好啱新年時候睇。不過靚湯事前曾預告同對手有唔少親熱場面，仲話老公唔會睇，但馬明否認話只係未播咋。
蕭正楠
蕭正楠Edwin同樣都係咁錫老婆，蛇年對阿蕭同老婆黃翠如嚟講真係特別有意義，就快榮升做爸爸嘅阿蕭已學定湊B技倆，包括換尿、抺屁股同BB沖涼等，希望到時唔會手忙腳亂。
鄭俊弘
講到湊b，鄭俊弘Fred就駕輕就熟，舊年年底阿Fred同太太何雁詩帶咗患有天使綜合症嘅囝囝Asher去美國接受治療，阿Fred話現時阿仔情況越嚟越好，開心又健康，仲已經識爬行，更笑言擔心BB喺屋企搗亂。講到小朋友呢個話題，伍富橋Alvin指同太太暫未有生B打算，幸好家人亦冇俾壓力。
中聲家族陳曉華 阮浩棕 何沛珈伍富橋