愛‧回家之開心速遞｜姚焯菲演金城安遠房親戚 獲徐榮朱凱婷讚有喜劇細胞

姚焯菲（Chantel）正式加入處境劇《愛‧回家之開心速遞》，我哋同大家直擊吓佢首日開工拍攝情況，今次Chantel喺劇中飾演徐榮同朱凱婷Heidi嘅女兒，一齊拜訪熊家。
姚焯菲加入《愛‧回家之開心速遞》嘅首日開工情況。Chantel首日開工嘅戲份就係到訪熊家。
Chantel由細到大都係《愛‧回家》忠粉，而家成為劇入面嘅角色，仲化身佢最愛角色金城安遠房親戚，令Chantel第一日開工時心情緊張又興奮，每句對白重複練習，希望做到最好，喺拍攝時得到劇組及熊家上下嘅關顧，令Chantel感覺好溫暖。
Chantel同媽媽Heidi一齊睇大家嘅演出。
飾演Chantel爸爸媽媽嘅徐榮同Heidi，大讚乖女表現，覺得佢講對白好自然，不過面對輕鬆嘅劇情時，見Chantel會忍唔住笑。徐榮同Heidi對Chantel份外有親切感，因為佢個角色名同Heidi真實嘅女兒暱稱一樣，而徐榮嘅大仔就同Chantel年紀相約，所以佢掌握到一啲同年輕人交流心得。
劇中Chantel飾演Heidi同徐榮嘅囡囡。
徐榮曾係上兩輯《愛‧回家》固定演員，呢次以另一身份再次回歸劇組，見到唔少老拍檔勾起昔日回憶，Heidi就話自己做司儀時一大叠稿都未驚過，但一收劇本無論幾多句對白都會好緊張，所以佢有同Chantel不斷練習。