張景淳獲愛回家慶生 點名歡迎Chantel參與切餅傳統

《愛‧回家之開心速遞》嘅劇組向來都好有愛，更有「有愛的11廠」之稱，日前一班熊家成員除咗同壽星公劉丹飲茶慶祝81歲之外，亦為嚟緊23號生日嘅張景淳慶祝農曆生日。一眾拍檔更準備咗兩個生日蛋糕同壽桃包製造生日驚喜，而最新加入《愛回家》大家庭、飾演熊家遠房親戚嘅姚焯菲，亦都係第一次參與熊家嘅慶生活動，睇嚟佢已經火速融入劇組啦。

張景淳亦係社交平台歡迎Chantel，佢喺帖文中表示：「歡迎最新成員Chantel第一次同我哋一起熱熱鬧鬧地過11廠生日切餅tradition。」除咗獲拍檔驚喜慶生之外，張景淳喺1月18日更舉行咗Fans Meeting同粉絲一齊賀牛一，佢嘅好兄弟羅天宇同埋李興華亦有到場祝賀，壽星公雖然呢日帶病上陣，但係仍然堅持開金口獻唱咗幾首黎明嘅金曲，好似《我的親愛》、《我這樣愛妳》等等，冧得粉絲們不知幾開心啊﹗