於澳門花車匯演盡顯才華 古淖文新歌MV蓄勢待發

古淖文 農曆新年期間參與咗澳門春節花車匯演，展示咗佢多才多藝嘅一面，佢唔單止以嘉賓身份載歌載舞參與表演宣傳澳門旅遊，仲代表澳門擔任葡文司儀，同 周奕瑋 以及 宋宛穎 共同主持澳門農曆新年花車巡遊開幕儀式。

German同宋宛穎仲有周奕瑋，一齊擔任澳門新年花車嘅活動主持
German一向有時尚觸覺，大年初三佢就著得非常鮮豔，配襯出節日喜氣洋洋嘅氣氛。好似喺表演環節時，佢就著上一套鮮桃紅套裝配以長珠鏈，而配合司儀身份，German就換上金黃色中國錦繡上衣配襯一頭粉紅色頭髮，耀眼醒神，既保留中國傳統特色又極具時代感。
German身穿嘅黃色上衣加上髮色夠晒喜慶

喺表演環節中，German化身澳門旅遊大使唱出《Lovin' My Stay》，由於要配合花車巡遊主題，所以German未有表演佢嘅新歌《Follow Me》，不過早前佢喺香港演唱會上，已經介紹咗比樂迷認識，而佢亦喺社交媒體上透露咗新歌MV嘅拍攝，咁各位古粉就要密切期待German新歌MV正式發佈啦。

呢日主場現身嘅German主持之餘亦有為觀眾獻唱