車婉婉召集《中聲3》選手食開年飯 大熱黃博無需養聲年糕照食唔嬲

《中聲好聲音3》戰況越來越激烈，已經到27強淘汰賽，而主持 車婉婉 召集一眾選手一齊食開年飯，尚在比賽中同經已被淘汰嘅選手都帶埋家人赴會。婉婉更主動開咪向未成婚嘅選手派利是，估唔到中聲3家族中尚未成家嘅男士十隻手指數晒，好似陸東成、羅逸軒同李創偉等。

羅逸軒坦言會喺蛇年努力成家，而陸東成反而開口祝婉婉連生貴子再添丁，婉婉聽到呢個「祝福」之後，即時有想同東成「開年」嘅諗法，仲大爆東成名草有主，反祝福對方添丁以作回敬。 
婉婉收到再添丁嘅祝福，即時光速耍晒手，見殘影就知佢咁抗拒喇

雖然中聲家族不時鬥嘴，但其實大家相當有愛，早前香港區百強戰時搞過大型聚會之後，呢日大家再夾時間團拜，唔少內地選手好似李金凱都有赴會，足足有7、80人參加大家都覺得好難得，唔少選手仲帶埋小朋友嚟逗利是。
成班志同道合嘅朋友齊聚，氣氛夠晒熱鬧

作為比賽大熱之一嘅黃博，出名有一把清亮又高音嘅靚聲，被問過年期間會否需要戒口，黃博反而話照樣會食年糕，取其意頭比賽步步高升。

唔少選手雖然比賽止步，但係經已培養出深厚友誼，好似楊溢、區瑞明、張家豪、熊力衡同四位美女選手謝珮珊、鍾凱瑩、姚芷慧、夏雪組隊出賀年歌《八聲報喜》，佢地唔止著古裝拍MＶ，鬼馬既廚師家豪仲反串演出呀。

其中8位成員組成「超星團」再推出賀年歌