古天樂暢談新年必做習俗 曾被人誤導初七前不能洗頭

中國人喺農曆新年期間，有唔少傳統習俗， 古天樂 周秀娜 同 胡子彤 就同我哋嘅主播 王鎮泉 分享佢哋有咩必做嘅傳統習俗，古仔慢慢由年卅晚食團年飯講起，佢話食飯前就要拜神，用碌柚葉沖涼，而大年初一就要食齋，年初二食開年飯，不過佢就話自己屋企唔擺桃花，所以一直都冇乜桃花。

古仔過年其實一樣忙，仲話屋企唔擺桃花所以冇乜桃花運
娜姐就話年廿八大掃除，大年初一唔可以沖涼，身旁嘅古天樂就自爆被人整蠱，佢話曾經有人同佢講年初一至年初七都唔可以洗頭，不過佢去到年初三經已好頭痕。
娜姐初一唔沖涼，仲勾起古仔被老點嘅搞笑往事

子彤就話每年大年初一都同家人食飯，兼且一大班親戚同埋表兄弟姊妹，聚埋一年一度嘅玩魚蝦蟹同打麻雀耍樂，另外近年就係期待返公司團拜。

胡子彤就每年都會同親友賭局試手氣喇