今晚乜都拗丨森美節目中驚見圈中八婆 麥美恩笑言拗到想動粗

森美主持嘅全新辯論形式節目《今晚乜都拗》嚟梗2月10號晚首播，森美邀請一眾有份參與節目嘅嘉賓麥美恩、丁子朗、周吉佩、支嚳儀、陳懿德、鄭衍峰、潘盈慧、李旻芳同曾展望出席節目記招，一齊欣賞預告片，森美大讚全部嘉賓喺成個辯論過程都係忘我咁玩，令佢驚見好多八婆。Mayanne話嗌交就當然唔會斯文，仲試過同商天娥爭辯時差啲想動粗。
森美主持嘅全新節目《今晚乜都拗》
記招上，一眾嘉賓已經針鋒相對，喺節目入面更加係口沫遮攔，而Mayanne就話旻芳嘅牙尖嘴利令佢有驚喜，而鄭衍峰就話成個節目嘅話題，唔知點解講極都會扯落感情度，佢更加係被Mayanne同阿盈等追問有冇食散餐同約炮話題。
呢日眾人出席記者會。
森美事前估唔到支支口才咁了得，而吉吉就話自己有獨門招數對付支支，就係當對方講道理時，以情理反擊，因為男人同女人講道理永遠都會輸。吉吉話平時喺屋企都唔講道理，原因係老婆講咩都啱，無道理講，佢笑言喺節目中終於可以做回自己暢所欲言，面對住德德仲係狂攻，德德自言做主持就多嘢講，其實私下就凡事以和為貴。
吉吉話喺節目中終於可以做返自己。