中年好聲音3｜大魔王黃博快歌舞台應戰耳目一新 高菲自知表現不穩邀張與辰加持

《中年好聲音3》今個星期日上演27強悲歌、勁歌大對決最後一個回合，大魔王黃博抽入勁歌組，鮮有唱勁歌嘅佢無論造型上或歌曲演繹上都有新突破，黃博選唱一首節奏輕快嘅英文歌《Can't Take My Eyes Off You》，同之前喺舞台嘅佢完全另一種感覺。
《中年好聲音3》即將上演 27強悲歌、勁歌大對決最後一個回合
除咗黃博嘅舞台令大家期待之外，有中聲3王菀之稱號嘅陳芷盈亦越戰越勇，佢出戰嘅舞台仲吸引到所有戰友喺等候室圍喺熒幕前面聽欣賞佢嘅演出。陳芷盈選唱高難度歌曲《領悟》，佢話因為喺感情經歷受過傷痛，想喺歌曲中表現嗰種情緒出來。
黃博
曹越同樣抽入悲歌組，佢選唱咗自己好鍾意嘅歌曲《夜夜夜夜》，因為之前見好多女性都翻唱呢首歌，而每當自己同自己對話時，聽呢首歌都會瞓唔著，為咗今次出戰曹越特別改編歌曲，刪減某啲部分，避免缺點曝露，希望令自己更淡定。
高菲
大灣區選手高菲幾輪比賽都出現發揮不穩嘅情況，有見及此，佢為呢個回合特別下苦功準備咗好耐，挑選咗電影主題曲《刻在我心底的名字》出戰，高菲話身邊有位朋友有電影中嘅經歷，想籍此送呢首歌俾好友，特別邀請張與辰為佢編曲。