李金凱獲頒筷子惹熱議 身殘志堅樂觀面對生命

《中年好聲音3》賽事激烈，集集精彩。而喺2月9號剛播出嘅一集27強三人PK戰，被封「生命鬥士」嘅38歲選手李金凱，因為演唱《那些感動過人的歌》，歌藝表現出色而得到92分佳績。金凱更獲評審之一 黃凱芹 選為今回合MVP，獲贈一對古象牙筷子，不過事後就有網民質疑，安排呢份獎品俾失去雙臂嘅金凱，認為安排不善。

李金凱嘅《那些感動過人的歌》演出，獲92分佳績同時，更成為回合MVP

不過節目播出後就引起討論，指送筷子作禮物有失關顧欠細心

不過樂觀過人嘅金凱就完全唔介意，仲話呢個獎係由偶像頒俾自己，意義比其他事更重大，亦好幸福。 金凱指留意到大家嘅評論並多謝各位關心，佢透露自己會使用筷子進食，仲笑言希望拎多幾次MVP，因為希望同好多好友一齊食飯，要多幾對筷子先夠。至於對於唔好嘅留言，金凱就話：「讓它隨風去吧，沒所謂的，還感激你們把我當正常人看待，你們還是會罵我一下什麼的。要不然，有時候只是過於關心，對於我們這樣的朋友來說會不好。大家把我當正常人看待就行了，謝謝大家。」 

李金凱本人毫不介意，唔止話自己都用筷子進餐，仲話希望收多幾對咁話

雖然金凱失去雙臂，但佢仍然樂觀積極面對生命，佢曾喺節目表示：「大家可以心痛我，但老天很公平的，我很開心很幸福。」而喺節目尾段，校長譚詠麟更驚喜錄影片段，隔空讚揚金凱聲線溫柔，唱出歌曲養分。能夠得到偶像鼓勵，亦令金凱特別興奮，佢仲表示自己一睇到校長條片感到難以置信，之後更睇足十幾次，心情非常感動。金凱仲期待未來有機會親身向校長道謝，可以同校長有一個大大嘅擁抱。

金凱對歌曲原唱譚校長讚賞亦非常感謝

李金凱希望大家當佢係一個普通常人咁看待