中年好聲音3｜陳芷盈勇奪97分力逼古淖文 MVP嘉許生命鬥士李金凱

星期日晚播出嘅《中年好聲音3》，27強三人PK賽最終回合，陳芷盈憑《領悟》奪得97分極佳分數，成績僅次於《中年好聲音2》冠軍古淖文當時嘅99分，表現非常厲害。

陳芷盈喺27強回合勇奪97分
雖然陳芷盈係呢個回合最高分數參賽者，不過嘉賓評審 黃凱芹 就選出選唱《那些感動過人的歌》；獲得92分嘅李金凱為回合MVP，Chris大讚佢唱歌技術出色之餘，受身體限制亦能夠傳達所有情感同技巧要求。

被譽為「生命鬥士」嘅李金凱，連得獎都正面又積極，佢話：「從沒有想過我能有多麼好的成績，我只是在想走上這條路，那我就努力去走，我是個這樣的一個人。經歷再多的痛苦，我都不會哭，沒有眼淚的，但是好的音樂我會流淚、好的電影我會流淚，看到自己的偶像可能會流淚。」
李金凱獲選為今回MVP

佢嘅偶像譚詠麟於節目末段以影片方式「現身」，隔空讚李金凱聲線溫柔，將《那些感動過人的歌》唱出另一種味道：「唱得好好，把聲好溫柔，而且timing同我唱法有啲唔同，畀到呢隻歌另一種養份，有唔同嘅生命。」
原唱譚校長亦都大讚

本回合再有三人跌入「中年危機區」，分別係羅逸軒、郭偉倫同高菲，最終評審選定淘汰高菲。初戰舞台時憑《祝福》一曲震懾評審嘅佢，今次選唱《刻在我心底的名字》陷入節奏兼 氣息不足問題，僅獲71分，被肥媽狠批甩beat，Chris更直言「畀唔到分你」，張佳添更認為佢表現未有突破。
高菲今回僅得71分，最終被淘汰

雖然高菲選唱此曲，係想將歌送予同自己有類似經歷嘅朋友：「如果拋開世俗眼光，我希望每一種愛情都得到尊重同祝福。」佢自言不太自信，心態已隨每輪比賽被「磨滅」：「第一輪心態可能比較好啲，呢個舞台好似魔咒咁，我對自己講唔好緊張，但每次上到台依然做唔到。」

至於選唱《小鎮姑娘》嘅趙浚承僅獲83分，不過眾評審評價不俗，曾以男子組合Square身份出道嘅佢，表示推過一首劣評如潮嘅跳唱快歌，自嘲唱慢歌「會舒適少少」。肥媽鼓勵佢勿框被框限制：「鍾意音樂嘅人， 快、慢、中版乜嘢都得，係唔好劃咗條界畀自己。」Chris就讚賞佢聲線配合肢體語言充滿男團影子：「有一剎那我忘記咗你係《中年》，我覺得好似男團喺度唱跳。」
趙浚承以輕快嘅《小鎮姑娘》出戰，收到不俗評價同81分

不過佢亦因唱錯歌詞，被Chris形容似「倒瀉籮乒乓波」：「個瀟灑唔見咗，開始變咗個中年人喺度執乒乓波，令到音準、beat、 groove 問題開始呈現咗，粉碎咗開頭個charm。」

《中年好聲音3》星期日晚 20:00 翡翠台