中年好聲音3｜27強競賽最終回有人奪終極高分 參加者「好過原唱」成觀眾競猜遊戲

《中年好聲音3》星期日晚將播出27強最終回合競賽，將有一個「勁歌組」同兩個「悲歌組」演出，演出歌單包括：陳芷盈《領悟》VS曹越《夜夜夜夜》VS羅逸軒《你是我心愛的姑娘》；郭偉倫《重口味》VS黃博《Can’t Take My Eyes Off You》VS趙浚承《小鎮姑娘》以及陳嘉琦《電燈膽》VS高菲《刻在我心底的名字》VS任永健 《螞蟻》。

27強競賽最後一回，6位參加者分成3組對決

黃博呢集會以英文歌出戰

據知今集將有超驚人極端分數，高分程度直逼去年憑唱英文歌 《Feeling Good》獲99分成績嘅古淖文。

而有「中3王菀之」之稱嘅陳芷盈，獻唱辛曉琪嘅《領悟》，不過佢就坦言唔覺得自己似Ivana，仲透露平日唱慣慘情歌。佢又指有將過往失戀心酸情緒放入演出，希望能唱出慘情同放生嘅感覺。全程投入獻唱嘅芷盈，當得悉分數後激動落淚，連在旁嘅車婉婉都感觸到眼濕濕！
因家人入院而非常憂心嘅陳芷盈，賽後感觸大哭

陳芷盈仲透露，其實錄影當日，大伯突然因腦幹出血緊急送院，佢坦言可能有將部分情緒帶到演出中。而陳奐仁對佢嘅演出嘅評語就非常玄：「歌唱比賽有兩個秘訣，一係唱得好過原唱，但冇乜改變；二係唱得同原唱唔同，但特別。你好得意，兩樣都做到。」

至於而被周國豐封為「女大魔王」；向來擅長唱情歌嘅黃博，今回被分派到「勁歌組」，直言初時「腦袋空白」揀歌無從入手，最終決定嘗試跳出comfort zone獻唱英文歌《Can’t Take My Eyes Off You》，但就惹來唔少批評。
擅長情歌演出嘅黃博，今次似乎表現未如理想

黃凱芹指佢 「唔夠奔放」，而陳奐仁狠批尾段「九唔搭八」，不過對黃博唱歌功仍予以肯定： 「識得扭音，係靚嘅，好好練習可以唱到容祖兒咁。」令人更好奇黃博最終成績。而呢集預告中，周國豐一句「唱得好過原唱」嘅評語，引來唔少觀眾討論主角誰屬，有人揣測係獻唱鄧麗欣歌曲《電燈膽》嘅陳嘉琦，到底邊位參賽者成功超越原唱？又係邊個獲得「天花板分數」？

《中年好聲音3》逢星期日晚 20：30 翡翠台