Stephy新歌MV男主角梁仲恆呻遇騙案 下月首開紅館個唱同步忙新片宣傳

鄧麗欣 近日推出新歌《不可得》，又邀請 梁仲恆 擔任MV男主角，拍攝當日阿炳仲要清晨冒10度低溫拍落水戲，難怪佢都笑言係為Stephy而搏命演出喇。

阿柄為拍Stephy新歌MV，冒10度低溫落水演出
《不可得》MV由阿炳嘅夢境出發，講述人面對失去時嘅抉擇，MV中嘅連場內心戲，佢仲出動埋真眼淚，而同樣係好戲之人嘅Stephy，同飾演阿炳童年嘅劉皓嵐拍攝分離場口時，亦真情流露淚流滿面。
歌曲故事源自阿柄呢位男主角嘅夢境

MV其中一幕阿炳於夢中遇溺，佢仲笑言係被騙會同Stephy同時落水而決定接演，當日仲冒10度低溫落水，點知最後成為被騙個案。而另一幕阿炳就夢見小時候同Stephy相處嘅美好時光，Stephy與飾演佢童年嘅劉皓嵐同枱食飯，場面溫馨。之後Stephy因故帶行李離開，皓嵐追到門前兩人對望相擁，Stephy淚流滿面難掩不捨。
Stephy同童年男主角演出本來非常溫馨

但係突然就變成別離

阿炳之後仲呷醋表示：「皓嵐同Stephy有對手戲，但我冇，我就覺得唔公平嘅。」又忍唔住大笑話：「我以為有(一齊)落水戲，最後直頭連對手戲都冇，天大騙局。不過見到你(Stephy)都開心嘅。」
阿柄搞笑指今次係撞正騙案，落水之餘連對手戲都冇

3月將舉行首次紅館演唱會嘅Stephy，亦透露籌備情況：「最近要處理好多嘢，例如呢首歌，新鮮錄好幾日就拍MV，仲有啲電影宣傳。剩低嘅時間就一心一意準備演唱會。」仲透露演唱會中會有舞蹈演出。

下月就會首次展開紅館個嘅Stephy，正同步排練中