方力申美國秘娶圈外女友 情人節放閃宣布喜訊

方力申喺2月14日情人節上午，突然於社交平台宣布同圈外女友葉萱Maple拉埋天教嘅好消息！小方撰文：「我們在這裏結婚了，祝大家情人節快樂。」並配圖貼出佢向Maple求婚嘅背影照。喜訊一出，唔少圈中人都紛紛留言道賀，包括：陳自瑤、蔡卓妍、容祖兒、森美等，陳瀅亦喺出席公開活動時向小方送上祝福。
 方力申
事後小方向各大傳媒分享自己嘅求婚計劃，原來喺上星期，佢喺美國Santa Monica beach租咗架飛機，仲喺機尾掛上「Maple，Merry me？」字句嘅求婚Banner。二人更即場影婚紗相，而衫都係小方預先安排好，到再換第二套婚紗嘅時候，小方預先安排嘅證婚人出現，佢仲向Maple話：「其實我想今日就結婚。」最後一對新人都感動到齊齊落淚。
 方力申與Maple於美國結婚。
現年44歲嘅小方，自2016年同鄧麗欣宣布分手結束十年情，先後同馮盈盈、陳曉華、陳瀅等女藝人傳出緋聞，但一直未有認愛，直到2023年公開認愛女朋友Maple。當時Maple正爆出曾遭韓國邪教教主鄭明析性侵一事，佢唔只喺紀錄片中現身講述過程，更親身到韓國上庭作證，而小方一直對女友呵護備至，小心保護對方。去年，鄭明析得法院制裁，小方亦公開讚女友勇敢。
 小方租咗架飛機嚟求婚。
小方對感情向來低調，未有公開過二人合照，而小方上年喺佛山開騷，有傳Maple戴住面具上台為男友伴舞。Maple雖然細小方14歲，但小方曾經喺訪問中表示，因為認識咗女友而對唔少事物持開放態度，更視對方為結婚對象，公開戀情時亦見過家長。
 Maple早前為小方伴舞。