獨家丨安德尊率「最強組合」向客戶拜年 阮浩棕被周潤發點名上位感驚喜

安德尊呢日化身財神，率領馮盈盈、朱敏瀚、陳懿德、阮浩棕、陳瀅，齊齊到一間廣告公司拜年。幾位同一眾員工玩遊戲又大派利是，相當喜氣！

安德尊化身財神，率眾人到廣告公司拜年。盈盈亦大讚氣氛好熱烈，仲話一開始都會擔心玩遊戲時，唔知問咩問題好，但原來大家對TVB節目、劇集了如指掌，問咩都識答。雖然朱仔就被大王投訴問問題嚴重放水，但佢地都覺得大家玩得開心係最重要。大王更笑言，自己雖然同客戶拜年經驗豐富，不過第一次帶住成隊都曾經喺《萬千星輝頒獎典禮》得獎過嘅藝人，所以佢地呢個係最強組合！

朱仔被指問問題時放水。眾人與眾員工一齊玩遊戲。

日前周潤發出席電影首映禮時，就點名大讚浩棕有實力潛質，睇好佢可以上位，令到浩棕都話意想不到，心情好激動。雖然得到發哥點名係一件美事，不過浩棕都話亦係一種壓力，所以自己要努力去做，先可以達到一個高度，自己都會視發哥做榜樣。
周潤發日前宣傳電影時，點名讚阮浩棕。阮浩棕回應被發哥點名力讚一事。