謝霆鋒久違開騷黃牛癲價17萬 拉姑一樣撲唔到飛嗌救命

自從 謝霆鋒 宣佈四月會喺啟德主場館舉行兩場演唱會之後，全城隨即陷入撲飛潮，門票開售隨即秒殺，認真一票難求。

霆鋒早前一宣佈於啟德開騷，即掀起外界嘅搶飛潮
有疑似黃牛黨就睇中霆鋒嘅號召力，近日開始喺網上放售都唔知真定假嘅門票，最誇張見到一張門票被炒到17萬，直頭離晒大譜！
網上仲傳出門票最新炒價高達17萬

其實霆鋒嘅演唱會飛可以炒到咁高嘅天價唔係冇原因，因為係佢事隔超過廿年再於香港開騷｜，就連阿媽 狄波拉 都嗌晒救命話冇飛，而大批撲唔到飛嘅歌迷亦不停敲碗希望會加場，但係老闆楊受成就話：「你知佢好有性格㗎，冇人可以叫到佢㗎，佢而家諗緊。」
搶飛情況連拉姑都求助無門，而老闆就話想加場都要霆鋒首肯先得

楊博士日前同Mani霍汶希，拉姑同霆鋒一齊向四哥謝賢拜年，久未公開露面嘅四哥精神不俗。而對於霆鋒演唱會飛被炒至六位數癲價，Mani就勸大家理性購票：「大家咁支持霆鋒當然開心，但希望大家理性啲，唔好咁炒貴啲飛，同埋唔好幫襯黃牛。」

唱片公司高層Mani就勸大家要以正式管道買飛，以免得不償失喇