中聲兩代大集合團拜超熱鬧 大強變大肚吉吉要七街瞓

要集齊《中年好聲音》兩輯嘅唱將，一定就係大型活動啦，呢日TVB Music Group嘅新春團拜，就當然可以集齊大班人馬喇，大家仲齊齊派利是同逗利是，再為公司嘅2月之星慶祝生日，氣氛就更熱烈喇。呢日多位中聲歌手參與公司團拜聚餐，Bill哥哥仲指過年被「搞大個肚」

大家過年時都放假好好充電休息，原來各位成員都節目不斷，好似 李佳 就有唔少學生同Fans去屋企拜年，而吳大強就笑指自己新年因為食得太多美食，被「搞大個肚」喇。至於 支嚳儀 雖然快閃台灣旅行，但係就因為假期唔少店鋪都休息，令佢略為失望喇。而 羅啟豪 就指對呢日團拜期待已久，但係因為要入院檢查，所以整枱點心自己都得個睇字，流哂口水呀。周吉佩 就早早安排同好友一齊度新歲，不過就因為唔少人都先後病倒，連太太同小朋友都打敗仗，搞到最後佢要喺工作室過夜呀。
中聲2嘅大家就更熱鬧，大家仲話出年浩賢冇得再收利是呀

中二嘅朋友過年一樣非常繽紛，好似 甘永傑 就被爆贏咗唔少新年財，而「財神爺」仲似乎係 劉威煌 喇。至於 梁浩賢 呢日就被一眾好戰友催婚，更紛紛指明年就唔再派利是俾佢咁話。