TVB賽馬日丨陳山聰貼中頭馬帶挈兄弟姊妹斬獲 陳豪義賣咖啡化身吉祥物任影

一年一度TVB賽馬日於2月9號隆重舉行，電視廣播有限公司行政主席許濤率領一眾行政人員，包括節目內容營運總經理曾志偉、 商務營運總經理蕭世和，以及超過50位藝員共襄盛舉，場面熱鬧。

行政主席許濤、總經理曾志偉、蕭世和仲有鎮台之寶汪明荃向嘉賓祝酒
一眾小生花旦盛裝赴會，龔嘉欣、林夏薇等首次出席呢個活動，譚俊彥笑指嘉欣今年旺，要跟嘉欣買馬，而陳展鵬都話跟薇薇買就得；蔡潔透露將呢日嘅利是錢all in買一隻最冷門嘅馬，希望有一個爆冷嘅機會。
一眾小生花旦超過50人齊齊參與賽馬日活動

不少人排住隊問志偉拎貼士，志偉笑言大家想輸錢就拎貼士，知道大家都想發新年財，志偉讚TVB貼士好準，無論係方駿暉講定係myTV SUPER 28台都好準，第一場貼6號、第二場貼9號，二隻都跑冠軍，志偉又指自己乜都買，所以命中率高。

汪明荃、展鵬、陳豪、洪永城及馬國明等眾藝員投入觀戰TVB盃，阿姐更大受馬迷歡迎，問阿姐拎簽名，當比賽正式開始時，小生花旦放低偶像包袱，狂叫自己支持嘅馬匹，最終陳山聰貼中頭馬，帶挈兄弟姊妹有斬獲，朱敏瀚同周嘉洛笑指彩金豐厚。

視后龔嘉欣首次參與TVB賽馬日，獲一眾小生包圍

許濤主席、曾生同阿姐亦代表頒獎，得獎嘅騎師更獻花畀阿姐，而「聲夢三寶」姚焯菲、鍾柔美及林智樂就為賽馬日打響頭炮，喺沙圈帶嚟活力舞台，姚焯菲同鍾柔美首次入馬場，有試吓投注初體驗，點知佢哋連馬匹已衝線都唔知。

Yumi同Chantel都係首次踏入馬場，對現場非常好奇
汪阿姐仲為現場馬迷簽名

此外，一眾藝人各自有特別任務，長老林秀怡同林正峰亦開壇邀請馬迷玩獎門人嘅遊戲，修哥就再度化身財神派利是，連視帝視后都爭住收祝福；展鵬同薇薇負責頒最佳外觀獎嘅馬匹，事前有落沙圈學睇靚馬。周吉佩同古淖文負責為《中年好聲音3》命名嘅賽事頒獎。
財神修哥派利是，極受大家歡迎

視帝陳豪呢日再度義賣咖啡做善事，呢次冇落場沖咖啡，轉做吉祥物畀善長打卡。高海寧今年參與「鐵馬」家族團拜，眾人去馬明屋企拜年，高海寧因拍賀歲片仲學識打麻雀，佢一試手氣食十三么，馬明讚高海寧運氣旺不斷自摸。

陳豪義賣招牌咖啡，收益用作慈善用途