黃淑蔓新MV與男角親密床戲 被爆加戲要對方半裸嬌羞否認

黃淑蔓 推出今年第一首派台作品《留在你在我在的腦海》，亦邀請「翻版陳柏霖」 王耀宏 擔任MV男主角，兩人嘅煙韌甜蜜溫馨場面，又即興除衫半裸演床戲，搞到Feanna面紅耳赤，仲笑言以後拍MV都要搵靚仔做男主角。

Feanna推出個人新歌，MV仲邀請王耀宏擔任男主角
雖然MV畫面甜蜜，不過原來係一首慘情歌，Feanna話：「唔係失戀歌，係講一段toxic relationships之中不斷拉鋸。好有張力，係我認為自己比較擅長嘅曲風。MV導演嘅概思亦好好。」
不過新歌就並非甜蜜結曲，而係講一段有毒關係

Feanna仲透露原定有kiss鏡頭：「喺山坡上嗰場戲，我哋頭貼頭、鼻貼鼻，當時嘅氣氛我以為會咀落去，但當兩個人貼到咁埋，擘大眼見到對方個樣好好笑，好似青蛙！」搞到氣氛破滅。
原本安排嘅親吻畫面，就因為不斷笑場而取消喇

男主角Meaning就爆料Feanna加戲，令佢要半裸上陣，Feanna即連聲否認話：「唔係我！（副導演？）呢度都多女仔，副導演都係女仔，有個咁嘅『美色』喺度，又好難抗拒！」
Meaning仲爆料話有人即場要求佢半裸上陣

MV電影同故事感十足，負傷嘅Meaning逃避追殺，邂逅活潑可愛嘅士多店員Feanna，展開一場欲斷難斷嘅虐戀。床戲之外，亦有嗌交、掟嘢同放火、開槍追殺等刺激場面。Feanna話：「我有啲驚演情緒極端嘅戲份，拍攝前我同Meaning跟邵美君老師上acting class。」
事前佢仲特別上堂以便投入演出

佢又自爆私下非常怕醜，亦抗拒同異性有肢體接觸，連私人健身教練亦係女性，所以今次MV嘅親密場面，都花唔少時間適應。

自言生性怕醜嘅佢，今次花唔少時間適應