姚焯菲孖爸爸探望港產大熊貓BB被電暈 捐5位數利是錢保育兼學習儲蓄管理

姚焯菲（Chantel）及爸爸姚輝文首度父女檔接job，為一間銀行舉辦大熊貓寶寶見面會做宣傳，率先入園跟港產大熊貓BB「家姐」、「細佬」近距離接觸，Chantel更捐5位數利是錢保育大熊貓。

Chantel捐出5位數利是錢保育大熊貓。
Chantel首次同爸爸一齊開工感覺好玩，仲親授「上鏡秘訣」畀姚父，仲教阿爸點樣走位同遷就鏡頭角度，盡量畀靚仔樣多啲出現喺鏡頭前，姚父第一次擔任幕前工作表現淡定，而Chantel睇住爸爸化妝，就話感覺有啲奇怪，事關平時係爸爸睇住佢化妝，今次互換角色相當特別，姚父坦言坐定化妝原來係好累，需要定力十足，更加覺得阿女做幕前唔易。

Chantel從細就鍾意大熊貓，父母亦經常帶佢去主題公園睇大熊貓，呢次首度睇可愛嘅大熊貓BB。
Chantel同爸爸探望一對港產大熊貓「家姐、細佬」時，見大熊貓BB睡覺同玩，更不時異口同聲狂讚可愛，完全被電暈，父女更流露出餅印般嘅陽光笑容；原來Chantel從細就鍾意大熊貓，父母亦經常帶佢去主題公園睇大熊貓，以往睇嘅「安安、佳佳」及「盈盈、樂樂」已係成年大熊貓，呢次首度睇可愛嘅大熊貓BB，姚父話呢對港產大熊貓BB喺香港出生，恍如有「香港身份證」，就好似大家一份子，值得大家愛錫同欣賞。

Chantel同爸爸探望一對港產大熊貓「家姐、細佬」時，見大熊貓BB睡覺同玩，更不時異口同聲狂讚可愛。
身為「吸金小天后」嘅Chantel坦言隨住成長，對理財興趣日益加深，加上姚父係國際知名投資公司首席財務官（CFO），Chantel從細就學懂儲蓄，將儲蓄用作其他用途，例如考慮進行投資理財，目標將財富增值，將錢用得更有價值，Chantel目前部份收入係親自管理，大數目則交由父母打理，近年利是錢99%存進戶口，唔會胡亂花錢購物，今年更捐出部份利是錢保育大熊貓，回饋社會，預計捐出5位數字。

身為「吸金小天后」嘅Chantel坦言隨住成長，對理財興趣日益加深。