StarTalk丨鄧麗欣與任達華合作亦師亦友 華哥笑言聽Stephy歌曲長大

任達華同鄧麗欣喺新戲中飾演一對父女，佢哋一齊作客《StarTalk》接受TVB娛樂新聞台主播王鎮泉訪問，華仔話戲中佢係一位承傳爺爺同爸爸傳統整紅豆沙手藝嘅師傅，同時又係一名固執傳統嘅潮洲人，生活中係重男輕女。飾演佢囡囡嘅Stephy話戲中其實好仰慕爸爸，會學習爸爸堅毅嘅個性。
任達華 鄧麗欣 一齊作客《StarTalk》。
為咗電影，佢哋跟師傅學整紅豆沙，華哥話自己絕對唔會整畀屋企人食，自己只會食唔會整，因為過程實在太辛苦。講到今次合作，Stephy話華哥一入戲就非常嚴肅，但停機之後就非常健談，兩人不論唱歌、畫畫等天南地北無所不談，佢大讚華哥係非常好嘅前輩同朋友。華哥就笑言係聽Stephy音樂長大，一直有欣賞對方演藝作品，覺得Stephy係好用心不斷求進步嘅藝人。
Stephy指華哥一入戲就會變得好嚴肅。華哥指自己聽Stephy啲歌長大。
華仔又講到戲中一家人經常食飯嘅畫面，跟佢現實生活中，經常同太太琦琦及囡囡食早餐畫面一樣，而透過食嘢一家人溝通機會多啲，而平日佢不時會同太太及囡囡短訊溝通，佢覺得現今科技拉近咗家嘅距離。
華哥分享同家人相處嘅點滴。