黃淑蔓迎出道十周年盼開個唱 新歌MV男主角太靚仔成焦點

黃淑蔓（Feanna）日前為今年第一首派台新歌《留在你在我在的腦海》喺商場舉行Music Live，現場非常熱鬧。新歌MV推出後反應不俗，加上極強電影感，歌迷指透過劇情見到不一樣嘅Feanna。

近日推出新歌嘅黃淑蔓於商場舉行演出
而Feanna就話：「MV好多戲要演，我盡量投入角色，同平時大家喺活動、台上唱歌嘅形象好唔同，我自己好鍾意。」不過有件事就令Feanna呷醋，佢話：「收到最多留言係『男主角好靚仔』，有少少嬲，我都係女主角，點解無人讚我？」 

新歌MV充滿電影感，唔少觀眾仲大讚男主角靚仔，令Feanna呷醋

Feanna喺活動上唔止首唱新歌，亦選唱《光引致疼痛》、《I am All Alone》等多首歌曲。到音樂會壓軸環節，Feanna就同十幾位校園大使合唱出道作品《差一點我們會飛》，同一班年輕人合唱，感覺非常青春又感動。 

呢日佢又同十多位年青人合唱出道作《差一點我們會飛》

今年就係Feanna出道10周年，佢話：「我好期待未來嘅音樂作品，或者影視作品，都多啲演戲發揮。今年出道10周年，希望有一個自己嘅音樂會作為紀念，同埋推出更多好作品，答謝大家支持。」 

原來今年已經係Feanna出道十周年

完騷後Feanna稱滿意自己表現，雖然開騷前非常緊張，但好在一開唱就好快投入氣氛，令佢沉醉喺音樂之中，好好享受表演。Feanna亦有選唱BLACKPINK成員Rosé嘅英文歌《Number One Girl》：「今次拍攝新歌MV時，導演Sheng經常播呢首歌作為背景音樂，幫我入戲，所以特別選唱呢首歌，希望我都可以成為大家嘅No.1 Girl。」