張與辰深情演繹融化張佳添 肥媽 陳曉東戲王上身互動爆笑

音樂節目《中年好聲音3》將會喺3月2號播出20強晉身16強賽上半場，今集評審團除咗有固定班底肥媽、張佳添、周國豐，音樂女神海兒亦載譽歸來，同陳曉東擔任嘉賓評審。由於今集節目主題係「那些年我們聽過85年至94年的電台歌曲」，所以將舞台亦化身做電台直播間，並且有資深唱片騎師區瑞強用靚聲帶觀眾進入《中聲3》20強競賽。
 區瑞強用靚聲帶觀眾進入呢場比賽。
本回合出戰參賽者及歌單有：李創偉《不羈的風》、侯靜伊《最愛是誰》、陳芷盈《女人的弱點》、陳嘉琦《難得有情人》、曹越《分手總要在雨天》、張與辰《一生何求》、陸東成《你令我快樂過》、王鄭浚仁《特別的愛給特別的你》、趙浚承《流言》及劉曉昆《愛上一個不回家的人》。
 海兒
喺24強晉身20強淘汰賽奪得MVP嘅張與辰，深情演繹陳百強嘅《一生何求》時唔只唱喊自己，更令全場拍掌歡呼聲，肥媽亦被佢歌聲感動得眼濕濕。與辰表示，諗起同家人嘅兒時回憶十分感觸，今次刻意撇開歌唱技巧，用心去投入演出：「乜都唔去諗，好純粹咁由心入面去感受隻歌。」
 陳曉東
評審東東對與辰激讚：「我聽第一句就明，聽第三句進入咗狀態，令到我都好感動，完全聽到晒入面種無奈，我覺得好好。」而經常將「Less is more」掛喺嘴邊嘅張佳添就坦言被融化：「一首簡單嘅歌，簡簡單單用個心唱就好好聽，中音至中低音嘅聲，直情融化咗我，覺得有一股能量罩咗呢間廠！」
 張與辰唱《一生何求》唱喊埋自己
除咗張與辰情感豐富嘅實力演出成為焦點，評審們之間嘅互動表現亦喺本集同樣勁搶Fo！
 肥媽又被唱到喊。
東東同肥媽默契同火花十足，不時就戲王上身模仿參賽者嘅苦情慘樣，引發全場爆笑。東東指陸東成造型似白馬王子，唱呂方歌曲《你令我快樂過》冇失戀感覺，肥媽就搞gag窒東東：「你即係話呂方似失戀啦！」令東東尷尬回應：「Er……係，多啲。」場面搞笑。
 肥媽同東東莫名地襯咗色。
而之前喺香港區賽區百強盲選時擔任嘉實評審嘅海兒，喺20強競賽回歸節目，淨係睇佢嘅單肩斜膊造型已經覺得非常吸睛！海兒今集更同一名男參賽者大玩紙巾互動，教佢點樣令氣息變得多元化，海兒揮動紙巾姿勢優美，仙氣十足，車婉婉都戥呢位男參賽者開心：「你就好，好多人都想同海兒老師玩紙巾！」至於係邊位男參賽者咁幸運，大家就要睇實今個星期日播出嘅節目喇
 
《中年好聲音3》逢星期日 20:00 翡翠台
張佳添周國豐