李佳3月尾舉行首個演唱會 預告獻唱中聲參賽以外歌曲

《中年好聲音》亞軍李佳喺三月尾舉行首個個人演唱會，喺記招上，多位中1戰友羅啟豪、丁文俊、支嚳儀（Venus）、吳大強，以及中2唱將李振鵬、《中年好聲音3》參賽者占士丁丁到嚟支持，咁重要嘅日子，佳佳嘅外籍丈夫同粉絲均有出現。
李佳為下月舉行嘅演唱會開記招。
佳佳仲喺記招上一展最拿手嘅爵士樂曲風歌曲，佳佳透露成個騷獻唱嘅歌曲都係之前冇喺《中年好聲音》比賽獻唱過，而其中一首仲要專登去學唱，佢話係一首時下好hit嘅歌。
李佳即場獻唱。
一眾中1戰友亦有喺台上勉勵佳佳，啟豪話睇住彼此成長，好驕傲終於見到佳佳開騷，呢個騷除咗圓咗佳佳嘅夢，啟豪都話係圓咗自己嘅夢。丁文俊話一直好鍾意佳佳好有韻味嘅聲，大強哥話佳佳嘅唱功喺近兩年進步神速，呢刻充滿子彈，絕對係開騷最好時候，Venus讚佳佳聲線好靚，好欣賞對方獻唱爵士樂。
一眾中聲戰友都有嚟撐場。
隻身喺英國來港參加《中聲3》賽事嘅占士丁丁，好感激佳佳一直幫忙，佢又讚佳佳係好友善嘅人，佢形容成個賽事好似坐過山車咁，而佢最大嘅挑戰廣東話發音，隨住比賽時間越嚟越短，佢話壓力開始大，但佢已覺得係夢想成真，會盡力表現去爭取最好成績。
羅啟豪、李佳、丁文俊李佳與支嚳儀