衛蘭二十周年巡唱生日前夕開騷 分享成長經歷鼓勵粉絲大膽追夢

衛蘭Janice早前首度參加內地綜藝節目《聲生不息‧大灣區季》，被內地嘅觀眾認識到佢嘅超級靚聲，為佢開拓新市場，稍後Janice將舉行入行以來首個世界巡迴演唱會，以廣州作為首站、除咗喺內地不同城市開騷之外，亦包括香港、澳門、馬來西亞、澳洲、美加等地方。
衛蘭將舉行世界巡迴演唱會。
巡唱首場咁啱係Janice生日前一日，佢格外興奮表示好耐冇開演唱會，經常被歌迷問佢幾時開騷，今次係入行二十周年演唱會，Janice好想同歌迷一齊慶祝，互相分享成長經歷及回憶以前嘅歌曲。
巡唱首場剛好係Janice嘅生日前夕。
Janice過去一年做咗唔少新嘗試，普通話有限公司嘅佢勇敢參加內地綜藝，最近仲同幾位好姊妹王君馨Grace、妹妹衛詩Jill、鍾舒漫Sherman、鍾舒褀Sukie姊妹開網上頻道分享心靈話題，令平日內向嘅Janice變得滔滔不絕，原來佢對唔少事都有好多睇法，亦希望借演唱會主題鼓勵大家作新嘗試。Janice憶起自己離開唱片公司後做獨立歌手，當時跳出自己舒適圈，擺脫別人眼中嘅佢，雖然唔容易，但都寄語大家放膽追求自己想做的事。