方大同女徒弟子發文悼念 透露恩師原計畫復出開騷

音樂才子 方大同 2月21日病逝，終年41歲。佢所創立嘅「賦音樂」3月1日突然公佈方大同離世，網上有消息指佢嘅告別式當日已於雲南舉行。方大同嘅去世令大批圈中好友同樂迷都非常震驚，而佢生前嘅兩位女徒弟 孔藝弦 同 王詩安 ，就指恩師一直愛護有加，經常帶住兩人一齊開騷，自方大同病逝後，兩人亦分別表達對不捨同思念。

方大同兩位女徒弟分別撰文悼念恩師
孔藝弦喺社交平台post咗一篇長文，回憶去年年底最後一次同方大同見面嘅情景：「那天你平靜地訴說著你經歷的最艱難時刻，讓我始料未及的揪心。原本就消瘦的你又瘦了一大圈，好在那時已經熬了過來。你說你仍在積極治療並逐步恢復中。我想你是怕大家擔心，才在熬過最艱難的時刻後才和我們分享你的近況。」
孔藝弦以長文回憶過去同方大同嘅相處，更指對方有意待康復後開騷

佢話當時方大同好開心知道呢幾年累積咗好多新歌迷，所以計劃等身體好轉就要辦演唱會同大家見面。雖然當時方大同明顯消瘦，仍堅持積極治療，大家都以為佢遲早會康復重返舞台，估唔到嗰次見面竟然成為永別。

孔藝弦透露2021年已離開公司，當時以為係疫情令公司撐唔住，好耐之後先知道原來當時方大同已經患病。佢話方大同對自己嚟講唔止係老闆，更係創作路上嘅精神支柱：「都說與偶像一起工作，濾鏡會破碎，但這世界上仍有這般美好、溫暖、謙遜、純粹又可愛的靈魂，而現在，我永遠失去了這個特別的人。」
年前一齊參與唔同演出

最後孔藝弦寫道：「現在寫信告訴你，你還能收到嗎？」佢話呢封信對佢嚟講寫得異常艱難，但見到大家都分享同方大同嘅回憶，令佢覺得呢位影響無數人嘅音樂才子，並未真正離開：「我想Soulboy不會真正離開我們的世界，你只是變成了小小的碎片住進了我們的靈魂裡，春風一吹，就會想起...。」
另一位徒弟王詩安亦對方大同離世非常悲傷

消息傳出當日佢就出Post，疑為飛往雲南出席悼念儀式

而另一位女徒弟王詩安，喺恩師病逝消息傳出當日，亦喺社交平台以黑底白字寫下「I love you always and forever」，表達對方大同嘅不捨之情。王詩安喺之後再喺社交平台post出一張由機艙望向窗外嘅相，並且寫道「去看你」，似乎準備出發雲南悼念方大同。到咗3號，王詩安再post出一張藍天白雲嘅相，並寫下「好心疼方媽」，唔知佢係咪已經身處雲南，並同白頭人送黑頭人嘅方大同嘅母親見面。

另一個Post則指非常心疼方媽媽