養生之旅｜陳煒練太極應付登山 曹永廉保持凍齡靠煲湯

陳煒、曹永廉、鍾凱瑩、游嘉欣日前搭高鐵，為節目《養生之旅》出發到貴州拍攝。四位喺呢趟行程中會帶大家尋覓養生方法，佢哋將會挑戰喺零下11度之下，行到一座海拔2500米左右嘅山，又會去睇中醫。
 陳煒、曹永廉、鍾凱瑩、游嘉欣日前搭高鐵出發去拍新節目。
為咗應付高海拔氣候，出發前幾位需要練氣功、打太極，掌握更多身心啟發。鍾凱瑩笑言學完後自己都同老公講可以學吓，因為學太極冇咁易受傷。煒哥就覺得上完太極堂後，可以訓練好自己嘅大腿肌肉，喺行山嘅時候可以行多幾級。
 出發前佢哋要先學太極。
雖然三位已經步入中年，阿廉更已「登六」，但外形睇落仍然維持凍齡狀態。阿廉話自己家族向來鍾意煲湯，不過唔知呢樣算唔算係凍齡秘訣。煒哥就表示會食多啲新鮮食物，仲開心分享喺呢趟旅程中會食黃果樹瀑布之中嘅魚。佢哋非常期待透過呢個旅程，充分明白到咩係「養生」。

曹永廉話靠飲湯嘅減齡。