譚詠麟首回應與陳百祥反目 親認明星足球隊風格不同分家

校長譚詠麟日前先帶同「老六兄弟」參與慈善節目演出，日前佢就驚喜現身 薛家燕 主持嘅電台節目錄音室，為接受訪問嘅明星足球隊「老六兄弟」成員衛志豪、莫家淦、張智軒、潘梓鋒、羅鈞滿同伍偉樂打氣。

「老六兄弟」現身薛家燕嘅電台節目，譚詠麟突然現身
早前有指阿倫同老友阿叻陳百祥，因明星足球隊分拆問題而鬧不和，阿倫一直未有回應，但喺節目中佢就多次提到阿叻，當阿倫沾沾自喜有過百首親自創作嘅歌曲時，家燕姐笑指要跟阿倫學習，皆因佢永遠都充滿自信，阿倫就話：「我都係跟阿叻學習，佢係主席，我係會員。」
阿叻最近另辦球隊，外界認為佢同阿倫等嘅友誼關係生變

家燕姐隨即追問明星足球隊是否分拆，阿倫亦直認不諱：「真係有呢件事，空穴來風必有因。」佢又續說：「出面啲人成日都問我係咪同阿叻唔啱？點會唔啱呀？幾十年朋友，唔會為咗呢啲嘢；不過當日睇到新聞條片個心都離一離，驚唔知點答傳媒朋友，返到屋企發咗幾晚噩夢，仲紥醒。」
家燕姐亦直接問到阿倫同阿叻之間嘅問題

阿倫話諗通咗件事就覺得好簡單，無論職業、商業、業餘都好，全球有咁多華人，個個都識我哋，嗰餅咁大，點搞都好，只不過依家覺得佢同我哋嘅風格有些少唔同，因為佢比較肉緊啲，我哋比較嬉戲啲，大家睇法唔同。全球咁大，佢想點踢同點睇都得，相信有一日，佢迷途會返嚟，但佢未必迷途，可能佢方向啱都未定，我都希望佢做到自己鍾意嘅，其實我哋私底下仲有見面呀，過年都有講恭喜發財。」

阿倫就笑言希望阿叻迷途之返喇