吳君如宣布父親夏春秋死訊 六合彩之父冬叔享年93歲

一代「六合彩之父」夏春秋離世，享年93歲，冬叔嘅女兒吳君如3月11號喺社交平台，上載一張冬叔年青時黑白相並公布父親死訊「我最愛嘅老豆走咗喇」。而冬叔嘅前新抱江美儀亦隨即喺社交平台悼念「永遠懷念你的笑臉 你的笑話 你的幽默」，「六合彩之子」蔡國威亦出Post表示會努力傳承崗位。

吳君如11號晚公佈父親夏春秋離世噩耗(演藝人協會訪問截圖)
冬叔近年鮮有露面，對上一次已經係2022年嘅中秋節，當時君如上載一條短片，冬叔仲透過鏡頭祝大家中秋節快樂。原名吳錦泉嘅冬叔，喺50年代加入娛樂圈，70年代至90年代期間一直主持「六合彩攪珠」節目18年之久，陪伴住好多香港人成就發財夢。
冬叔主持六合彩多年，40周年時馬會亦特別邀請冬叔出山任嘉賓

冬叔生動嘅演繹方式，早已成為觀眾眼中嘅經典，加上經驗豐富，獲封「六合彩之父」稱號，而馬會喺2016年慶祝六合彩40週年嘅金多寶攪珠，都特別邀請冬叔出山擔任嘉賓主持，當時冬叔依然談笑風生，仲話不時都會有人問佢六合彩貼士，而冬叔就有一個中六合彩嘅獨特見解喇。
兩代六合彩長壽主持冬叔與蔡國威早年同場

冬叔風趣嘅一面亦遺傳咗畀女兒吳君如，兩父女只要一同框，就會發放笑彈，君如主持清談節目《星星同學會》其中一集，冬叔就好似粉絲咁喺台下舉牌應援，驚喜現身同女兒傾談，冬叔仲話自己係君如嘅忠實粉絲，兼且喺台上爆料。
吳君如當年主持《星星同學會》亦曾邀冬叔父女同台

年青嘅冬叔對娛樂圈感興趣，所以透過做播音員入行，先後效力麗的電視同亞洲電視，接拍唔少經典劇集及電影，角色多充滿冬叔樂觀同正面個性。至於夏春秋點解會叫自己做冬叔，佢就曾經解釋佢藝名中四季獨欠冬天，所以被外界封為冬叔。回顧演藝生涯，冬叔喺接受演藝人協會訪問中，曾表示畢生最大成就係生咗女兒吳君如。