李佳Jazz音樂會羅啟豪任嘉賓 赴美加演出擔心時差影響港騷

李佳 月底就會舉行佢參加《中聲》後嘅首個正式演唱會，佢仲邀請埋戰友 羅啟豪 擔任嘉賓，仲會齊齊演唱唔少爵士歌曲。Ramon仲話雖然平時曲風比較少Jazz嘅風格，不過就認為有唔同味道，更加係一個挑戰咁話。

李佳早前已開始為即將舉行嘅音樂會排練
至於一直笑到唔停嘅李佳，就話猶如回到從前每晚為大家演出歌唱一樣，仲笑言自己當年一唱歌就會不自覺隨之起舞，身材亦因而非常唔錯，連Ramon都話希望擔任完呢次嘉賓會變瘦呀。
仲邀請咗羅啟豪擔任嘉賓

3月中會飛往美加演出嘅李佳，開騷前兩日先返抵香港，仲令佢有少少擔心影響聲線，不過最令佢擔心嘅就係15個鐘頭嘅時差問題，所以要諗諗方法解決喇。

Ramon仲提醒佳佳坐長途機要多飲水養聲