金秀賢同未成年金賽綸拍拖遭狠批 周杰倫交往未成年昆凌反獲大讚

金秀賢被爆同已故女星金賽綸曾秘密拍拖，以及疑似逼債七億韓元導致對方走上絕路，事件令金秀賢遭到輿論抨擊，已經陸續有廣告商同佢切割，估計違約金損失有可能高達200億韓元，事件令金秀賢形象插水，尤其同當年得15歲嘅金賽綸拍拖，對未成年人下手嘅行為，更加引起強烈批評，不過台灣就有網友提出質疑，指昆凌同周杰倫拍拖時只得17歲，同樣都係未成年，點解唔會引起倒伐？對於呢個疑問，有網友就做出分析指最大差異在於男方嘅態度。
已故女星金賽綸金秀賢
周董同昆凌拍拖後，一直對女方疼愛有加，仲多次動用資源為昆凌爭取幕前工作機會，最後直接將對方私有化成為周太，仲搞咗個古堡童話婚禮。相比之下金秀賢唔單止由頭到尾否認同金賽綸拍拖，甚至逼佢償還7億違約金，以金秀賢嘅吸金能力，淨係內地一年代言費就曾經超過4億人民幣，等於900億韓元，為咗7億就逼死曾經嘅女朋友，更顯得金秀賢嘅無情。
金秀賢被爆出與金賽綸秘戀。
另外再講到法律層面，台灣法律規定，男女滿16歲即有性自主權，所以就算周董同昆凌17歲時就發生親密關係，都唔會有法律上嘅問題。至於韓國法律喺2020年之前，最低合意性交年齡係13歲，而金秀賢同金賽綸交往時是15歲，所以金秀賢同樣冇違法。不過2020年爆發「N號房事件」，韓國政府修法將最低合法性交年齡從13歲提高至16歲。但2020年實施新法時，金賽綸已經20歲，因此也不適用新規定，金秀賢雖然法律上無罪，但已經造成社會一般觀感不佳。
周杰倫同昆凌相當恩愛。
事件引起討論之後好多網友紛紛表示意見，「請不要講金秀賢同周杰倫相提並論」、「周杰倫和金秀賢是完全不一樣的故事」、「根本差很多，一個當公主生三胎，一個討債逼死人」。