周杰倫被瘋傳豪賭輸過億身家 好兄弟劉耕宏護航發圖文闢謠

台灣天王 周杰倫 近日無端被捲入疑似豪賭而輸身家嘅是非傳聞，消息更一度衝上內地社交平台文娛榜熱搜第3位，令周董嘅粉絲同好兄弟劉耕宏都要跳出黎為周杰護航，駁斥謠言。

日前內地瘋傳，一位「超一線男星」喺澳門賭場連賭7日，最終輸咗超過10億資產，更將豪宅、私人飛機等抵押還債，更至為為求翻身借賃3億。傳聞仲指該男星嘅內地經理人公司喺3月9號深夜發聲明，承認存在「個人財務問題」，該男星3月10號仲連被五個品牌宣布解約。
網上一篇指男巨星連賭7日﹐賭輸10億仲牽連至影響工作

呢則小道消息仲寫埋「經過權威渠道確認」字眼，亦提及「國際金融調查機構」、「澳門金融管理局」等，令唔少人都認為可信度十足，更有人直指呢位男星就係周杰倫。
周杰倫仲無端被指就係涉事男星

事關早喺去年，吳尊一家欣賞Taylor Swift嘅澳洲巡唱時，曾感謝昆凌讓票。而佢Show出演唱會門票印有當地賭場Logo，加上周董近年不停開巡唱，間接造成有人謠傳「周杰倫開演唱會還債」、「周杰倫豪賭欠債」消息，所以呢次內地傳出「超一線男星欠債」傳出時，就有人認為周董係事件主角。
傳聞起因估計就只係去年嘅一張演唱會飛

但周董近幾年除咗忙於開騷之外，就係專心喺澳洲享受天倫之樂，最近又為五月天澳洲站巡唱擔任嘉賓，不時會喺網上分享生活，更有唔少人不時喺澳洲偶遇周董。所以有心水清Fans整理好澄清懶人包，指周董喺北京、上海根本無房產，傳聞中所稱「3月9號該男星內地公司發過聲明」亦同周董公司無關，因為周董公司連Post都冇出過，更加不存在所謂「五個品牌解約事件」。
老死劉耕宏即出Post代澄清

而周董嘅好兄弟 劉耕宏 就喺3月11號出Post，分享多張周董同大家一齊做運動嘅相，仲撰文表示：「我發一個杰倫《廈門》跳操，制衡一下奇怪的熱搜😂。別浪費了大眾的資源，把它導向到有意義的地方，別再網上道聽塗說了.我們今晚還有跳操喔！請各位把專注力放在自己的健康上，趕快畊上來…2025 全民動起來。不管澳門還是廈門…只要跟著跳操，走過幸福的門就是我們！」為陷入傳聞嘅周董闢謠！

出Post又出文，呢啲先係真朋友
周董亦喺社交平台持續出Post，好似帶住小朋友出門郊遊，近日又同 柯有綸 等朋友去聚，絲毫未受「輸10億」傳聞影響。

周董未理傳言，近日同柯有綸等好友結伴相聚