金秀賢終承認曾戀金賽綸 否認於女方未成年時拍拖

上月16號喺屋企自殺身亡嘅24歲韓國女星金賽綸，其家人連日透過網上節目《橫豎研究所》揭金賽綸於15歲時，與年長12歲嘅金秀賢拍拖六年，其家人續指金秀賢創立嘅經理人公司Gold Medalist，去年要求金賽綸償還代為支付約7億韓圜（約370萬港元）賠償金，事件令金賽綸曾聯絡金秀賢，期望可以分期還款，可惜遭男方封鎖。
《橫豎研究所》再公開一張金秀賢與金賽綸未曾曝光嘅合照。
自金賽綸生前曾公開一張跟金秀賢合照開始至她死後，金秀賢公司Gold Medalist曾四度否認戀情，並表示會提告造謠者。直至今日（14號），Gold Medalist突然發出聲明，承認金秀賢與金賽綸曾於2019年夏天至2020年秋天交往，但否認於女方未成年時已開始戀情。
金賽綸生前於限時動態公開嘅合照。
聲明中更指出金賽綸喺2024年3月24日凌晨透過IG限時動態公開同金秀賢嘅合照，以及《橫豎研究所》喺11號於節目中所公開嘅相片，都係攝於2020年冬天，而相中金賽綸着住嘅服飾則能證明，因為該衣物為2019年6月某品牌發布嘅款式。至於被指逼死金賽綸嘅指控，聲明以「不能因為金秀賢是明星，就無條件地接受無數的虛假事實和人身攻擊。」作回應。
金秀賢服兵役時寫嘅信件。
對於有指金秀賢服兵役時曾寫情書給金賽綸，公司聲稱信件是寫給一位親近朋友，而信中提及的「Seronero」，是金賽綸平日使用名字，並非金秀賢專用嘅暱稱。公司再指《橫豎研究所》追擊行為，令金秀賢心理狀態極度不安，「《橫豎研究所》於12日節目結束後，持攝影機的人員在公司正門對面和停車場守候至凌晨，13日中午又有攝影人員在建築物周邊徘徊，對金秀賢造成極大心理壓力。」
金秀賢服兵役照
《橫豎研究所》於13號再公開一張金秀賢跟金賽綸貼臉親密照後，警告金秀賢若下周亂說話，將再公開三張更激相片同短片，網上有傳言將公開金秀賢喺金賽綸屋企全裸洗碗相片。
金秀賢
另外，金賽綸家人將透過法律討回公道，將入稟控告金秀賢「侵害死者名譽」，根據當地《刑法》第305條，若金秀賢與未成年嘅金賽綸發生性關係，無論當事人是否自願，均可能構成強罪，最高可判處5年以下有期徒刑或3000萬韓圜（約16萬港元）罰款。