第18屆亞洲電影大獎｜劉青雲憑《爸爸》封帝 影后榮歸沙哈娜戈斯瓦米

《第18屆亞洲電影大獎頒獎典禮》星期日晚喺西九戲曲中心舉行，最佳男主角由 劉青雲 於《爸爸》當中嘅傑出表現封帝，亦係佢首次獲得亞洲電影大獎表揚，而女主角則由印度電影《桑托什》嘅沙哈娜戈斯瓦米奪得。最佳導演由日本電影《敵》嘅吉田大八獲得，而最佳電影則係印度電影《乘著光的幻想》。

劉青雲以《爸爸》中嘅沉鬱演出首封亞洲電影大獎影帝

《桑托什》嘅女主角沙哈娜戈斯瓦米榮封今屆影后
頒獎禮前指自己信心十足嘅青雲，非常感謝片中扮演佢家人嘅合作拍檔，包括同時提名最佳新人嘅 蘇文濤 ，佢又勉勵港產片同業繼續努力。
最佳男、女配角都被台灣演員收歸囊中， 楊貴媚 同 李康生 分別憑《小雁與吳愛麗》同《默視錄》獲獎。
金馬女配角楊貴媚呢晚再下一城，再獲亞洲電影大獎女配角

同樣演戲經驗豐富嘅李康生，今次首封最佳男配角

Kōki光希獲大會頒發亞洲飛躍演員獎，佢事後受訪時透露正為新片角色作準備，更指日內就會公佈於香港演出新片計畫，期間仲會喺香港逗留約一個月。
放映時成績非常突出嘅《九龍城寨之圍城》分別獲得最佳剪接與最佳美術指導兩獎，同樣賺人熱淚嘅《破。地獄》則成為最佳原創音樂獎得主。南韓電影《破墓》連獲最佳視覺效果同最佳造型設計兩獎。

Kōki光希受訪時透露，將於香港展開新電影拍攝

最佳新演員由日本電影《青春末世物語》嘅栗原颯人奪得，佢於台上感觸激動落淚。而獲頒AFA新世代獎嘅 吳慷仁 一上台就以流利廣東話發言，佢笑指自己已年過40歲並非新世代，本來唔明白得獎原因，不過後來明白大會希望佢負起傳承嘅責任。

每次演出都令人眼前一亮嘅吳慷仁，以廣東話上台接受獎項