鄧麗欣演唱會Cookies合體獨欠傅穎蒲茜兒 Theresa社交平台分享近照自爆身體狀況亮紅燈

鄧麗欣Stephy一連三場紅館演唱會噚晚完美落幕，6名Cookies成員楊愛瑾（Miki）、吳雨霏（Kary）、馬思恆（Helena）、陳素瑩（Gloria）、區文詩（Angela）及何綺玲（Elaine）喺Encore環節上台，相隔13年再度合體唱《心急人上》及《Forever Friends》，獨欠傅穎（Theresa）及蒲茜兒（Serena），傅穎雖然人冇到，不過佢有送花籃祝Stephy演唱會成功。

鄧麗欣Stephy一連三場紅館演唱會噚晚完美落幕，6名Cookies成員喺Encore環節上台。
Stephy受訪期間就話決定開騷已構思搵Cookies喺紅館合體，佢坦言真係好唔容易，因為有啲成員唔喺香港，各人亦要安排時間，雖然唔係全部齊人，但係Stephy有幾個成員嚟到，佢都好開心好珍惜；Stephy又指有問過Theresa，但真係冇辦法強求大家嘅時間夾到，大家都有自己忙碌嘅嘢。

Cookies成員相隔13年再度合體唱《心急人上》及《Forever Friends》，獨欠傅穎及蒲茜兒。
唔少網民都好奇40歲傅穎（現名傅寶誼）點解冇出席，撇除早年傳傅穎與Cookies成員不和，查實傅穎近年主力喺內地發展，不時喺社交平台分享近況，上載生活點滴嘅影片，早前上載與媽媽一齊浸溫泉，母女半裸嘅照片，日前又拍片喺杭州開心出遊坐巴士，自爆過去兩年因食素，未有注意營養均衡而出事，身體狀況已亮起紅燈，由於中醫診斷稱「氣若游絲」，令傅穎要破戒食肉，傅穎亦為咗健康多做運動，日前上載做健身嘅影片，笑稱自己身高167厘米，體重54公斤，自嘲呢身肉幾強壯，話要努力健身，應付嚟緊嘅工作，似乎真係好忙噃！

傅穎近年主力喺內地發展，曾自爆過去兩年因食素，未有注意營養均衡而出事，身體狀況已亮起紅燈。

傅穎早前上載與媽媽一齊浸溫泉，母女半裸嘅照片。

傅穎日前上載做健身嘅影片，笑稱自己身高167厘米，體重54公斤，自嘲呢身肉幾強壯。