Cookies五餅結伴撐鄧麗欣開騷 台上與MC調情令對方耳仔爆紅

鄧麗欣Stephy 一連三場紅館演唱會 15號 舉行第二場，林建岳博士、Cookies成員吳雨霏Kary、楊愛謹Miki、區文詩Angela、何綺玲Elaine與陳素瑩Gloria，陳嘉寶、何嘉莉、森美、填詞人Oscar、小肥、吳若希等都有捧場。
鄧麗欣 15號舉行演唱會第二場。
呢晚Stephy邀請嚟曾喺電影《我談的那場戀愛》中合作嘅 MC張天賦 擔任嘉賓，台上Stephy完美還原戲中為對方打領呔嘅調情戲，搞到MC耳仔秒速爆紅！面對Stephy嘅取笑，MC不停用手撥風為自己降溫，同時表示：「其實我好緊張，因為好少同你咁近距離，上次係拍戲打呔嗰陣，所以依家都有啲餘韻，好緊張！」
Stephy同MC重演戲中打呔一幕調情戲。
MC坦言綵排時見到Stephy對高踭鞋好高，搞到自己唔敢行近，之後又指自己每次演出最緊張嘅就係記歌詞，不過呢次佢就完全唔擔心：「因為啲歌詞我好熟，我好自信可以望住你唱。」令Stephy無奈表示：「唉，你講啦，細細個去唱K成日唱吖嘛，我畀你講，無所謂！」MC毫不客氣，指呢次同Stephy合唱係成就解鎖，完成兒時夢想，令全場笑聲。
呢晚有MC張天賦任嘉賓。
Stephy透露演唱會期間，大銀幕展示嘅畫作係佢特別為呢次演唱會而畫，佢指堅持畫畫嘅原因，係希望視覺上都加入自己嘅心思：「可能只有我自己明白，例如創作期間嘅思考，都可以注入一啲神秘嘅力量，融入演唱會。」完場後歌迷遲遲唔肯散場，寵粉嘅Stephy只好再次登場encore《最後一塊》。
吳若希同老公一齊去睇Stephy。陳素瑩Gloria、鄧麗欣Stephy、楊愛謹Miki、何綺玲Elaine。