蘇慧倫準備開騷獲好友張震嶽撐場 面對阿仔自認兼具虎媽及慈母特質

出道35年嘅蘇慧倫，即將舉行演唱會，呢日佢現身記招宣傳，獲好友張震嶽撐場，二人識於微時，慧倫剛推出嘅新專輯都有阿嶽嘅作品。

蘇慧倫呢日為佢嘅演唱會宣傳
阿嶽笑指自己創作咗兩首歌，即場抱怨慧倫喺歌庫只係揀咗一首，慧倫聞言即大笑，隨後反問一個專輯放兩首阿嶽嘅歌，怕感覺太偏心；問到阿嶽好似幾傷心，慧倫笑言阿嶽係率直嘅人，跟呢種朋友相處係好開心又舒服。
仲同好友張震嶽合唱多年前嘅經典合唱歌

慧倫同阿嶽喺工作上合作無間，呢日佢哋應在場傳媒要求，清唱30年前嘅合唱歌《希望你會懂》，慧倫近呢兩年再次活躍喺幕前，佢話因為9歲阿仔越嚟越大，而家自己有時間出嚟工作，仲指阿仔遺傳好歌喉，非常有表演欲，慧倫暫時希望阿仔專心喺課業上，亦自認兼具虎媽及慈母嘅特質，不時轉換相處模式。