盧巧音事隔3年再開騷延續時間線 盼重返20歲重新開始做好每件事

盧巧音 事隔3年，下月將再開騷，以音樂同樂迷分享音樂旅程，今次係Candy繼2022年6月舉行「Candy Lo Timeline Concert」後，再次以Timeline時間綫為主題。

Candy相隔數年再次開騷，佢就親自分享今次演唱嘅主題 : 「今次演唱會同3年前比較，訊息傳遞同氣氛都有改變。上次演唱會感覺比較沉實，氣氛亦比較深沉。而今次雖然繼續以Timeline為題，不過未必係一個延續。可以講係一個重溫，將時間綫嘅概念再次活現喺觀眾眼前。」
盧巧音下月將再次舉行演唱會，門票今日起優先發售

因為有新體驗，所以Candy決定2025年重新啟航，嶄新演繹佢嘅音樂同心靈時間綫。Candy認為每個人對時間嘅感覺都有分別 : 「時間對我嚟講，其實係一個概念，而每個人心中嘅概念都有主觀性，我覺得我哋係活喺過去、現實同未來嘅混合當中。 如果有時光機，我希望重返20 歲，可以再從頭開始過，將所有嘢都做得更加好。」
近年奉行健康生活嘅佢，仲話希望可以重返20歲

演唱會以「重溫」同「創新」為主軸，帶出7大人生階段，而Candy就話：「我冇諗過要點樣劃分呢幾個人生階段，反正人生都係等食、等瞓、等死。只係由我哋自己點樣將唔同階段活得更有意義、更有內容。到老嘅時候再回望，覺得自己冇枉過亦冇後悔就得。 」
演唱會同大家討論人生7大階段，Candy希望同大家一齊探討當中意義

近年積極投入健康減炭生活嘅Candy，又指希望觀眾抱輕鬆心情入場，佢話：「希望觀眾帶住輕鬆心情嚟睇，到演唱會結束時，可以攞到啲嘢走，例如回憶......大家一齊返到以前成長嘅片段，一齊回顧過去嘅自己，大家都有得着。」

演唱會將於4月26號於旺角麥花臣場館舉行，門票3月12日(星期三)網上預售、3月18日(星期二)公開發售。