鄭秀文5月澳門演騷周五公售 劇透升級內容嘉賓晚晚不同

鄭秀文 5月會喺澳門連續兩個周末舉行6場《You & Mi鄭秀文澳門演唱會2025》，日前信用咭優先訂票反應已非常熱烈。而3月7號中午起於門票就會公開發售。
已開始籌備演出嘅Sammi，務求為大家帶來一場升級版演唱會，當中每個細節Sammi同團隊都花盡心思：「揀綜藝館係因為佢可以容納到萬幾位觀眾，人數同紅館一樣，又可以整到四面台，成個設置比較貼合同符合我哋個製作。」

Sammi已開始為5月於澳門舉行嘅6場升級版演出準備
對有樂迷好奇澳門站演出內容同香港站嘅分別，對自己要求極高嘅Sammi，透露會於基礎上加入新元素。佢話：「上次演唱會好多朋友都買唔到飛，我好希望盡量保留香港站嘅元素，再加入新元素。等上次冇睇嘅觀眾可以睇到咁好嘅製作同演出，睇過嘅朋友又會有新驚喜，咁就可以兼顧到兩邊嘅朋友，呢個係我同團隊深思熟慮嘅諗法，希望做到盡善盡美去報答大家對我嘅支持。」
佢話當中演出、服裝同嘉賓都會加入新元素

至於造型方面，一向有「百變天后」之稱嘅Sammi就叫大家唔使擔心：「呢方面我自己都好怕悶，會有啲唔同嘅造型。」而嘉賓方面Sammi就指同香港站一樣，每一場都有唔同嘉賓，更直言樂迷一定唔會失望：「好多謝每一位接受我邀請嘅嘉賓，有你哋坐陣令到演唱會有更多火花，音樂上又會有多啲趣味。今次演唱會每一場都有唔同嘉賓，敬請期待！」

Sammi指香港演出唔少觀眾都搶唔到飛，所以會保留部份精髓