MC張天賦再惹桃色新聞 認出道之後結識異性更驚惕

MC張天賦、馮允謙同衛蘭聯合為一套動畫電影《無敵貓劍俠：8+1條命》配音，三位舞台演出駕輕就熟，MC同馮允謙首度聲演，馮允謙講嘢好細聲，呢次要聲演50歲男士，所以馮允謙被迫講嘢粗聲粗氣，衛蘭今次亦聲演粗魯霸道嘅角色：「完全唔似我，我要特登壓低把聲，要粗魯啲，因為我平時好斯文。」

MC聲演貪食、易發脾氣又成日覺得好委屈嘅熊仔，MC笑言做回自己就得，MC近排為首個紅館騷密鑼緊鼓練習，希望盡自己最大努力呈現最好一面畀觀眾睇，雖然MC落力備戰，不過佢依然是非纏身，再次惹上桃色新聞，早前J2台節目《不正常愛情研究所》主持文頌男（Koba）大爆男性好友嘅女友與一位英文字母歌手出軌，網民猜測該名英文字母歌手係MC，MC直言冇乜留意呢類新聞：「講到咁，又提起我，算啦！呢方面嘅新聞冇得控制外界點講，喺呢個時候最好係做好自己。」MC自認出道之後結識異性已更加驚惕，亦學習處理同面對呢啲新聞。