38歲何傲芝成功嫁入豪門,一對新人噚晚喺君悅酒店大排筵席,不少城中名人及藝人現身,包括前港姐何傲兒(現名何天兒)、沈卓盈、Bob林盛斌及黃婉曼等,據知何傲芝老公為「帝皇翡翠」創辦人兼行政總裁董吳玲玲之子董必政,董吳玲玲曾任仁濟醫院主席,有「翡翠皇后」之稱。
好友黃婉曼於凌晨喺IG貼出多張相,並開心祝賀對新人,稱老懷安慰嘅一晚,一對新人雙喜臨門,黃婉曼寫道:「值得幸福,白頭到老!睇吓大家為你哋笑得幾開心。」
何傲芝曾喺2009年加入TVB,做《東張西望》主持人,近年轉做香港馬評人,有指何傲芝與董必政拍拖多年,經常甜蜜拍拖。