馬國明攜湯洛雯「鐵馬家族」團拜晒婚戒 陳茵媺朱凱婷閨密照由陳豪幕後操刀

農曆新年拜年係傳統習俗，到親朋好友家拜訪，互相祝福，分享賀年美食，尤其圈中人日常工作比較忙，難得有時間相聚，林夏薇、黃嘉樂及朱凱婷分別喺IG分享大合照。

馬明與「靚湯」湯洛雯拍拖兩年幾，今年求婚成功，呢日靚湯戴住求婚鑽戒，踏入兔年，呢對準新人四出拜年，馬國明同未婚妻靚湯今年初五與「鐵馬家族」團拜，靚湯以準馬太身份加入「鐵馬家族」，而新婚嘅黃嘉樂係第一年派利是，合照見靚湯流露幸福甜笑，非常搶鏡。

陳茵媺今日貼出與好友朱凱婷嘅合照，姊妹情深，更公開呢輯相嘅拍攝花絮，見陳豪同朱凱婷老公林德勤以「老公視角」為佢哋拍照，陳豪負責打光燈、林德勤拎住手機影，一邊拍一邊商量用咩角度影最好，務求影到陳茵媺同朱凱婷都滿意，由於陳豪同林德勤對話幾搞笑，哄到兩位老婆笑得相當開心。 

此外，日前胡定欣、劉愷威、黃翠如、蕭正楠、洪永城、周嘉洛、黃長興、趙希洛及梁諾妍，前往林夏薇家中團拜，劉愷威由內地返港過農曆新年，林夏薇都話難得咁齊人同大家拜年，不過同場未見與劉愷威蜜運中嘅內地女星李曉峰！