中年好聲音丨評審唔Buy支嚳儀演出有暗湧 龍婷宣傳5月底開音樂會

無綫歌唱真人騷《中年好聲音》2號晚將會播出第 18 集，咁多位選手將會爭入八強嘅席位！嚟到第六部曲《男歌女唱！女歌男唱》，將會有杜德偉擔任嘉賓評審，而呢集出場首有龍婷 《特別的愛給特別的你》、周吉佩《我願意》、李佳《她來聽我的演唱會》、支嚳儀《頭髮亂了》、涂家堯《味道》、顏志恒《原來你什麼都不要》、 吳大強《月亮代表我的心》、羅啟豪《破曉》同林鉫徫《眼色》。

成日甜笑、畀肥媽戲言係賣牙膏廣告嘅龍婷，今次竟然嚟個「走甜」版！以皮褸 Rock 妹造型獻唱《特別的愛給特別的你》，令大家令人眼前 一亮，仲畀杜德偉讚係「人騷合一」，而肥媽亦笑言：「有隻小魔怪走咗出嚟。」

而支嚳儀同樣走型格路線，以白恤衫加吊帶西褲上陣，一出場時坐喺張櫈上面睇文件，有種霸氣女總裁嘅感覺，相當有型。今次支嚳儀除咗玩跳唱《頭髮亂了》外，更首度挑戰唱Rap，佢搵嚟好友、《聲夢傳奇2》嘅畢業生Sean文佐匡助陣，幫手創作英文Rap嘅歌詞。

雖然支嚳儀個造型上令人耳目一新，但評審似乎對佢嘅表演唔太服落，杜德偉直言：「當你做第一個動作時，我就覺得唉...你嘅郁動唔夠大同 Powerful，一開頭已經輸咗。」而伍仲衡仲叫佢唔好喺比賽度做未做過嘅嘢，聽落好似有啲危機！

而林鉫徫今集改以妖味look登場，化上濃濃眼妝獻唱 《眼色》嘅佢，表演期間拉咪飆高音，令周國豐話：「見到你揀呢隻歌，覺得你癲咗，再睇埋你出嚟嘅妝，係嘩咗出嚟，但你嘅妝同首歌係Match 嘅，因為件事係癲嘅。」而杜德偉就大讚：「感受到你嘅努力同誠意，令我覺得自己都唔知唱唔唱到咁犀利，你個Range真係好闊。」

今集評審肥媽同伍仲衡就上演牙骹戰！喺顏志恒表演《原來你什麼都不要》時，有評審話志恒唱到似撩交嗌咁，但肥媽就力撐：「阿媽喺大廳，所以唔使驚！你最尾個Note可以hold咁耐，係好難㗎！有啲唔係唱歌嘅人係唔會明白，我哋呢啲唱歌嘅人就非常明白。」點知伍仲衡插嘴話唱歌係唱畀聽眾聽，但係9成9嘅觀眾都唔係歌手，肥媽聽到即時激動到彈起：「比賽最緊要評判畀分！」最後要坐喺佢哋中間嘅杜德偉調停呀！

此外，繼早前宣佈《中年》嘅參賽者將會喺5月舉街《中年好聲音 – 夢想成真演唱會》後，龍婷亦會喺 5月28號於香港文化中心音樂廳，聯同香港青年愛樂樂團舉行「星夢交響慈善音樂會」。對於相隔半年時間就可以再舉行個唱，龍婷話自己心情相當興奮，仲話到時會喺舞台上呈現多樣化嘅歌唱風格呀！

《中年好聲音》逢星期日 20:30  翡翠台