真係唔好笑｜晨旱任務曝女主持素顏 水戰連場Mayanne勢不可擋

由 何廣沛 麥美恩 馮盈盈 郭子豪 彭慧中  方紹聰 同 羅毓儀(Yuki)主持嘅《真係唔好笑》今晚播出第6集，仲邀請咗 謝東閔 擔任嘉賓。今集節目一開場已經非常有睇頭，喺元朗合宿嘅主持天朦光一早就收到起床任務，好似要叫醒隊友做早操、幫隊員敷面膜同刷牙等，相當無厘頭，亦令幾位女主持素顏曝光。

今集繼續分成兩組進行比賽，分別係紅組嘅Mayanne、FYY、郭子豪同奶仔，對戰藍組嘅何廣沛、閔大人、彭慧中同Yuki。今集遊戲水戰連場，佢哋就由第一個遊戲濕到最後一個，其中以「水球速遞」最為過癮，玩法係隊員要揸迷你電單車合作送水，送得愈多愈好。

最愛扮嘢嘅子豪賽前就大晒模仿個人技，還原電影《頭文字 D》經典場口，又扮陳冠希口音話：「因為你GTR個車頭太重，個位好唔自然，所以永遠都會甩碌。」正式比賽時更加笑料百出，何廣沛一度失控炒車跌落地，鬼馬嘅Yuki則交足戲化身「碰瓷黨」婆婆。

最後一個遊戲「滑嘟嘟水戰」亦係焦點所在，玩法係兩隊人馬喺佈滿洗潔精嘅水池對決，各人為求勝出不擇手段，出盡茅招阻礙對手！兩隊男士攬來攬去十足玩泥漿摔角，奶仔出動街頭武術絕學「肥美風火輪」碌來碌去，身手相當了得，鬥到最後仲連水兜都玩爛埋。

而女子組方面，Mayanne賽前揚言會「玩得溫柔啲」，不過一落場就變臉搏老命，就算Phoebe出招捉實佢隻腳都冇用，Mayanne無視一切拖住對方前進，非常勇猛。到最後嘅男女混戰場面完全失控，Matthew出動「奪命鉸剪腳」鉗實子豪，Phoebe就再次樹熊上身夾實 Mayanne，奶仔仲玩到「講不出聲」，非常誇張。

《真係唔好笑》星期六(今)晚 22:15 翡翠台