陳瀅露玉背騷美腿吸睛 孖好姊妹何雁詩度假玩得盡興

陳瀅日前同「痞子殿下」拍檔朱敏瀚、周嘉洛及王灝兒（JW）前往清邁拍旅遊真人騷，原來佢約咗好姊妹何雁詩一齊去澳門水上樂園玩，早前何雁詩率先喺IG貼出水着照，大晒產後fit爆身材，而陳瀅今日先喺IG貼出多張自己晒玉背、騷美腿嘅靚相！


陳瀅指好鍾意週末度假，唔需要計劃同思考任何嘢，可以玩水又唔需要擔心天氣或陽光，見二人當日玩得相當盡興，陳瀅雖然遲咗貼相，不過fans仍然好受落，出post一粒鐘已有逾1.4萬like，就知陳瀅泳照look好吸睛。

而何雁詩目前身在日本旅行，差足電先有力氣返嚟搏殺，佢笑指第一次擺低老公鄭俊弘，跟兒子鄭讚廷（Asher）及父母一齊去玩，坦言今趟扶老攜幼去旅行有啲吃力，但係一見到好嘢食，何雁詩立即忘記晒一切，開心稱東京算係baby friendly嘅地方，好多百貨公司都有配套好全面嘅育嬰室，又會有專用電梯，何雁詩喺搵餐廳食飯嗰陣，亦會先上網睇吓嗰間餐廳準唔准帶小朋友，要飲飽食醉返嚟，迎接7月10日新歌派送。