亞洲超星團｜65練習生正式式公開 香港9人代表入圍各自爭勝

由 TVB 聯同 星空衛視 合作打造嘅全新偶像選秀節目《亞洲超星團》 ，公佈入圍名單幾個小時之後，瞬即成為微博文娛榜熱搜第一位，閱讀量更閃電衝破4.6億次。

TVB將於香港獨家播出嘅全新偶像選秀節目《亞洲超星團》，以打造一支喺世界流行文化領域具有影響力同號召力嘅男子組合為目標。 節目製作團隊早前喺全亞洲各地展開招募練習生計劃，先後喺內地、香港、澳門、台灣、日本同韓國等唔同地方，精選出65名各具潛力嘅練習生。

入圍嘅65人將喺節目中接受專業製作人同訓練師嘅指導同培訓，亦透過不同任務、演出仲有考核踏上蛻變之路。練習生亦會即時接受「超星製作人」；亦即係全亞洲觀眾投票，呢支全新亞洲超級偶像團體將根據投票結果產生、以香港為起點、踏上征途正式出道。

《亞洲超星團》星期二訪過微博公開65名練習生嘅官方圖片、姓名等資料，消息一出旋即引發熱話，TVB官網亦正式公布名練習生名單，官方靚相同宣傳片段，亦接受各界網友投票﹐選出「最高人氣練習生」，投票方法同詳情 http://asiasuperyoung.tvb.com 。

練習生中其中9名來自香港，其中包括5位TVB藝人： 丁子朗 冼靖峰  黃奕斌 文佐匡 同 黃星綽 ，仲有 余宗遙 張鎬濂  區珀豪 同 方玉亨 。而其餘練習生分別來自內地、澳門、台灣、日本、韓國、越南同美國。

部份練習生嘅官方短片，已陸續上載至微博，而洪欣嘅兒子 張鎬濂 截至今日10:00暫時收穫最多like，以女友視覺派心心嘅佢，獲唔少網友讚靚仔；至於第二名多like嘅就係Archie，唔少網友對Archi親切男孩形象大為受落。

而參演過唔少劇集嘅丁子朗同Hugo黃奕斌就以奇招搶灘，丁丁以纖腰搶鏡，獲讚一睇就係運動型男仔；至於Hugo就放棄擅長嘅跳舞，改以認真拳拳到肉耍功夫成功突圍。

同樣有精彩表現嘅仲有擅長芭蕾舞嘅 方玉亨，佢喺片段大晒柔軟身手，唔止獲網友大讚可愛，連媽咪 歐陽妙芝 都留言為乖仔打氣。

丁丁今次突然轉戰選秀節目，令唔少網友觀眾都覺得愕然，而丁丁亦直認唱跳經驗教少，仲話謂：「今次突然轉軚去唱歌跳舞，係希望畀到驚喜同驚嚇觀眾，依家密鑼緊鼓練習緊，唔想影衰香港人同埋TVB。另一方面係抱住學嘢嘅心態去參賽，雖然呢句嘢好娘，但係真嘅。」

早前已跟歌唱老師學習增值嘅的丁丁，仲自覺勝算不高：「自己最唔叻嘅地方就係唱歌同跳舞，對手真係好勁，佢哋好多都練咗3、5年甚至更耐。今次同咁多精英合作，可以感受到佢哋嘅態度，佢哋每個人對跳舞都好執着，依家我哋每日排舞10個鐘以上，短短一個月令我對表演嘅感覺唔一樣咗。」

而一向唱歌為主嘅Archie，則希望藉比賽跳出comfort zone：「想唱歌以外做好跳舞，參加比賽前有做跳舞training，入到比賽開始正式訓練之後就開始好intensive咁受訓，好想push自己去到好盡，睇吓可以去到咩level。」佢亦坦言參賽並非瞄準輸贏而戰：「係自己攞到幾多嘢走，能力有幾多提升到。」佢又大讚各位練習生各有特色：「佢哋唱歌嘅腔調同跳舞style都會隨住佢哋原居地有所唔同， 淨係可以有機會欣賞到呢樣嘢已經係執到。」