林君蓮為新歌拍攝MV 與男主角拍親密動作戲感尷尬

林君蓮近日再推出新歌《Why Are You Always Looking At Me》，身為新一代創作歌手嘅佢，今次貫徹以往作風，繼續自己包辦作曲填詞。

呢日蓮姐為新歌拍攝MV時，就同大家分享創作新歌嘅靈感，係由街上途人嘅目光而延伸嘅。缺乏戀愛經驗嘅蓮姐，今次喺MV入面同男主角有唔少親密動作，當中仲有近乎臉貼臉嘅對望。蓮姐表示自己係拍MV嘅前一晚先知MV有男主角，但佢就話MV嘅故事同佢腦海中嘅畫面都幾近似，笑言自己同MV導演幾投契呀。

由於同男主角都係初次見面，所以蓮姐話拍攝時都有啲緊張，但好在拍拍下大家開始熟絡先少咗份尷尬。