TVB節目巡禮｜來年精彩劇集節目正式公開 各式戲劇綜藝輪流獻上

《無綫節目巡禮2024》星期五晚喺電視城盛大舉行，逾百位藝員為來年推出嘅全新劇集同節目亮相宣傳，今年節目巡禮更特意增添萬聖節元素令氣氛更為熱鬧。呢晚盛況剪輯而成嘅特備節目《TVB繼續創新節目巡禮 2024》，下周六晚就會播出，為大家詳細介紹一眾精彩節目。 

11月就踏入無綫電視56周年台慶月，秉承「留住初心 繼續創新」精神，台前幕後繼續致力炮製嶄新題材王牌節目同劇集，翡翠台將會推出《飛常日誌》、《再見・枕邊人》、《神耆小子》、 《逆天奇案2》、《非常檢控觀》、《奪命提示》、《巾幗梟雄之懸崖》、《企業強人》、 《反黑英雄》同《法證先鋒6倖存者的救贖》共十套王牌劇集。

綜藝節目方面， 翡翠台同J2分別為大家帶來《福祿壽訓練學院》、《2024國際中華小姐競選》、《芷珊約您》、《早啲知早啲醫》、《金牌媒人B.O.B.》、《亞洲超星團》、《紅白聲級戰》、 《超級毛特兒大賽2》、《膽粗粗‧Here We Go 2》、《世伯唔知我去西伯利亞》、 《Home即是識》、《La La Girls選拔賽》、《怪宿宿》、《動物森友島》等各式各樣多元節目。

喺以上嘅綜藝節目當中，最吸引嘅可能算係由李思捷、阮兆祥、王祖藍主持嘅《福祿壽訓練學 院》喇。節目除咗係佢哋同香港電視觀眾闊別六年後再次合體之外，亦係香港首個扮嘢真人 Show。

福祿壽久別螢幕後將會再次重組

一向扮嘢功夫了得嘅三子會親身落場宣揚「扮嘢」文化，培育有強烈表演欲嘅新世代藝人；節目更會衝出香港、全球公開招募別具扮嘢天份同潛質嘅學員，通過重重測試選出新一代「扮嘢之王」！

喺節目巡禮播出嘅宣傳片，三子除咗Cross Over《中年好聲音》強調「以舞台讓無數人成就夢想」外，祖藍、思捷冋祥仔亦使出看家本領扮演「淋作」、「蔡燶華」同「肥蝦」，佢哋無論髮型、眼神同神態都同原裝人物似到足，當中又以扮演淋作嘅祖藍最為神似，一頭似到十足嘅亂髮， 再加「我嘅律師團隊未嚟之前，我係唔會回應你任何嘢嘅」，惡搞味濃！

宣傳片又加插首輪海選精彩片段，雖然參加者畫面全部「經過特別處理」，不過片段亦隱約見到有人扮演《功夫》中嘅「包租婆」元秋、《食神》嘅薛家燕，仲有經典鬼片人物貞子等，似乎吸引唔少隱世高手參加。

而旨在打造世界流行文化領域別具影響力男子組合嘅全新選秀節目《亞洲超星團》，分別由內地、香港、澳門、台灣、日本同韓國等精選出65位超星練習生進行蛻變同改造。導師陣容亦相當有份量，節目召集人曾志偉邀請韓國殿堂級偶像Rain擔任超星總製作人外，更邀請咗蘇志威、程瀟、朱正廷、蘇運瑩 同農夫（C君、陸永）擔任導師。

韓流頂級明星Rain將為《亞洲超星團》擔任總製作人

宣傳片當中一眾練習生施展渾身解數爭取男團席位，Rain喺評審期間見到一班未來之星亦真情流露，唔止遇到表現優秀成員時會大讚，遇到有人唔夠認真時亦會嚴肅斥責。因參與節目更備受關注嘅丁子朗，亦有現身宣傳片，仲包括特寫鏡頭，似乎喺節目中有不俗表現。 

丁子朗亦65位成員之一

早前曾以《最佳男主角》、《最佳女主角》同《單對單》等專訪節目，展現超強主持實力嘅黎芷珊，亦會主持全新節目 《芷珊約您》，先後同五位喺香港樂壇地位舉足輕重嘅代表，貼身直擊佢哋世界巡迴演唱會盛況，亦會同各位嘉賓暢談人生。

黎芷珊亦會緊貼幾位歌手日常，分享佢哋唔同睇法

將現身節目嘅歌手包括有張敬軒(紐約)、楊千嬅(上海)、王嘉爾(澳門)同溫拿（澳門及馬來西亞)等，走入除巨星身邊一齊體驗工作日常，好似被軒仔封為「超級土豪」嘅加長禮車搭乘體驗，芷珊更同王嘉爾十指緊扣自拍！

而主持大少婚禮永冇甩拖嘅林盛斌(Bob)，亦會推出全新戀愛配對真人Show《金牌媒人B.O.B.》，食正自己「媒人界 Best of the Best」身份，繼續將發揮「月老本色」解救寂寞的心，為單身女士們物色獨一無二嘅Best Of The Best真命天子，同樣噱頭十足。

阿Bob則繼續發揮佢媒人佬強勁功力撥行大葵扇

《TVB繼續創新節目巡禮2024》星期六(11月4號) 晚 20:30 翡翠台