吸金女王炎明熹為備考減少出活動 李克勤聖誕休息陪家人

炎明熹呢日同李克勤、許靖韻等一齊出席活動，計一計，Gigi已經係喺48小時內出席咗4個活動，真係忙到冇停手，不過Gigi就話好享受呢種充實嘅生活呀！

早前處女騷尾場因為受到天氣影響而延期到出年先舉行，原來係因為Gigi 12月要閉關考試呀，佢就同大家講定11月尾見佢嘅次數會減少，到佢考完試後會再同大家講喇。Gigi又話除咗準備考試外，自己都想休息下返鄉下，到時可能會買衫畀家人做禮物喎。

睇住Gigi成長嘅克勤，就大讚對方進步大，介話如果Gigi有需要，自己好樂意做對方演唱會嘉賓呀。自己本身都忙住開騷嘅克勤，單係11月上半個月已經飛咗5個地方，出完活動嘅第二日又要飛去美國開騷，至於講到聖誕，克勤就話應該會休息同家人過喇。對於網上唔少人讚老婆盧淑儀保養得宜，克勤就話係因為太太生日所以大家畀面啫，仲話件事已經過咗，叫大唔好追問畀陷阱佢踩呀！

而早前花五百幾萬購入人生第二層樣嘅許靖韻，佢話買樓嘅決定嚟得好急，家人都係喺佢買完樓，透過新聞先知佢買咗樓，許靖韻話屋企人知道後雖然好戥佢開心，但同時都驚佢會唔夠錢使呀！