電影泉攻略｜盛傳《復仇者聯盟》初代6人回歸 Kevin Feige開腔回應｜EP80

王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。

千呼萬喚《哥斯拉大戰金剛》嘅續集終於推出第一條預告片喇！今次呢條預告片有好多新驚喜，除咗有好得意嘅金剛BB之外，大反派紅毛金剛亦都有現身。估計今次金剛同哥斯拉將會聯手對付反派，而哥斯拉亦貌似再度進化，識跑之餘，背上仲會發出粉紅色光㗎！

其實電影公司喺2014年哥斯拉推出開始，已經展開咗佢哋嘅怪獸宇宙，之後嘅《金剛：骷髏島》、《​​哥斯拉II：王者巨獸》、《哥斯拉大戰金剛》嘅劇情都係互相串連起嚟，究竟今次電影可唔可以延續好成續就要拭目以待喇。

本周嘅新片速遞有：《旺卡》將史上最暢銷童書之一嘅【查理和巧克力工廠 Charlie and the Chocolate Factory】搬上大銀幕，講述朱古力掌門人Willy Wonka年輕時期嘅經歷。《橙油燈》真人真事改編，講述一名39歲嘅頂級汽車銷售業務員，發現患上早期腦退化症，佢對於身邊人嘅過份關懷，感到高壓力，直到佢遇到另一個都係患病嘅營業員，先令佢知道點去面對。《荒草殘雪》女主角Merve Dizda首位榮封康城影后嘅土耳其女演員，小學老師一直期待調職返去城市學校，但一封學生寫畀佢嘅情書，衍生出佢性騷擾學生嘅指控，令佢嘅夢想幻滅。面對同袍情誼惡化、其他教職員嘅竊竊私語，令佢臨近崩潰邊緣，直到遇見幫佢克服難關嘅女老師，先令呢個絕望嘅寒冬起變化。《爆裂點》林超賢同張家輝續激戰後再度強強聯手，臥底江銘身份連環遭遇曝光危機, 面對大額毒品買賣起貪念，決定背棄師傅李振邦嘅教導，而李振邦堅守警員信念，誓要捉拿愛徒歸案。

之前盛傳Marvel會搵返《復仇者聯盟》初代6人回歸，包括飾演Iron Man嘅Robert Downey Jr.，不過Marvel嘅總裁Kevin Feige就開腔表示而家同將來都絕對唔會畀Iron Man回歸，因為佢哋唔想破壞Iron Man自我犧牲呢幕嘅重大意義。

本周票房戰況截至12月6號中午，第3位係《拿破崙》、第2位係《白日之下》、第1位就係《年少日記》。