劉德華林子祥為《潛行》首度合唱 結合80年代經典+AI人工智能MV

由劉德華監製，金像最佳攝影關智耀執導，劉德華、林家棟、彭于晏及劉雅瑟領銜主演犯罪動作片《潛行》，將於明年1月11日震撼上映﹗今日推出電影宣傳曲及MV，華仔邀請林子祥一同翻唱經典廣東歌〈難為正邪定分界〉，成為兩位首支合唱歌。MV更別開生面以最新科技AI(人工智能)技術創作，畫面呈現出兩位巨星多個動畫造型，包括驚喜「回春」Look，非常趣怪有型，華仔又大讚今次阿Lam為歌曲加持，「魔鬼」級演繹無人能及，更即場邀請阿Lam復出，再次合作拍電影。
 
身兼監製嘅華仔近貼科技潮流，決定以最新AI技術創作〈難為正邪定分界〉MV，當中畫面風格荒誕趣怪，跟電影呈現陽剛味大相逕庭，相當有新鮮感。MV入面以夢幻繽紛的糖果世界為背景，暗喻《潛行》戲中迷人忘憂嘅毒品網絡，今次華仔跟阿Lam喺MV分別飾演糖果店及朱古力店老闆，代表一正一邪，華仔努力興建糖果世界，偏偏阿Lam轉眼破壞，二人世世代代不停纏繞對抗6000年，關係勢不兩立，互鬥之下正邪逐漸難分，二人更頓時喺MV驚喜「回春」。
 
阿Lam受訪時話：「劉德華點可以做魔鬼㗎﹗」華仔誇讚阿Lam唱功無人能敵，大讚阿Lam演繹得相當有層次。阿Lam暗示羡幕華仔：「我拍戲我都想做個反派，永遠冇機會演。」華仔聽畢立即邀請阿Lam演出，更承諾對方只須拍30個工作天，保證每日有10小時睡眠，利誘阿Lam出山，華仔笑言：「我們拍過年那種賀歲電影，開開心心的就好，其實我也不知道夠不夠錢請你，哈哈。」華仔重提自己名作《童夢奇緣》，笑言可以跟阿Lam演兩父子，不過阿Lam調轉做兒子。事實上，華仔第一部擔任重要角色電影，正係1982年跟阿Lam合演《投奔怒海》，而上一次兩位喺銀幕上合作，已係34年前嘅《最佳男朋友》，事隔多年，難怪華仔想再邀好友一齊再上大銀幕！